زیندانیە سیاسیەكانی رۆژهەڵات بۆ كۆبانی ماندەگرن

بە پێی هەواڵی گەیشتوو بە زاگرۆس پۆست، هەموو زیندانیانی سیاسی رۆژهەڵاتی كوردستان رایانگەیاندووە بە مەبەستی پشتیوانی لە خەڵكی خۆڕاگری شاری كۆبانی لە رۆژئاوای كوردستان و هێرشە نامرۆڤانەكانی داعش بۆ سەر ئەو شارە، دەست دەدەنە مانگرتن لە خواردن.

ئەمە لەحاڵێكدایە كە بە دەیان زیندانی سیاسی كورد لە زیندانەكانی كۆماری ئیسلامی دەستبەسەرن.
لە هەواڵێكدا كە ماوەیەك پێش ئێستا كەمپەینی بەرگری لە زیندانیانی سیاسی و مەدنی ئێران وكوردستان بڵاوی كردەوە، زیاتر لەسەدا 40 ی زیندانیانی سیاسی ئێران كوردن و ئەوەش باس لەوە دەكات كە لە ئێرانی ژێر دەسەڵاتی كۆماری ئیسلامی چالاكانی كورد لە ژێر زەخت و گوشارێكی لە رادەبەدەردان و بە تەنیا لە زیندانی ناوەندیی ورمێ زیاتر لە 45 زیندانی سیاسی دەستبەسەر كراون كە 10 كەسیان بە ئێعدام مەحكوم كراون.