زاگرۆس پۆست
هیوا فوولادی رۆژنامەنووس و بەرپرسی ماڵپەڕی شارنیوز، رۆژی چوارشەممە ٩ی مانگی رەزبەر بانگ كرایە دادگای شاری سەقز و بڕیارە لەوێ محاكەمە بكرێ.
ئەو رۆژنامەنووسە كوردە، بە هۆی بڵاو كردنەوەی چەند وتار و راپۆرت لە ماڵپەڕەكەی، لە لایەن دادگای شاری سەقزەوە بە “تێكدانی نەزمی گشتی” تۆمەتبار كراوە.
ئەمە لە حاڵێكدایە كە هیوا فوولادی رایگەیاندووە كە لەسەر سكاڵای فەرمانداری شاری سەقز بانگ كراوەتە دادگا, چوونكە هەواڵێكی لەسەر پیس بوونی ئاوی خواردنی شاری سەقز لە سەر ماڵپەڕەكەی بڵاو كردبووەوە.
جێگای ئاماژەیە، پێشتریش هەواڵنێرێكی ماڵپەری شارنیوز بەهۆی بڵاو كردنەوەی هەواڵی چالاكی كەمپەینەكانی كۆكردنەوەی یارمەتی بۆ ئاوارەكانی شەنگال، دوربینی فیلمبەردارییەكەی لەلایەن ئیدارەی ئەماكێنی شاری سەقزەوە دەستی بەسەردا گیرابوو.
ئەمەش لەحاڵێكدایە كە، چەند رۆژ لەوەپێش حەسەن رۆحانی سەرۆكی كۆماری ئیسلامی ئێران لە وتاردانێكدا باسی لەوە كردبوو كە هیچ رۆژنامەوانێ لە لایەن دەوڵەتەوە بانگ نەكراوە و لە زینداندا بەسەر نابات، بەڵام ئێستا 13 رۆژنامەنووسی كورد لە زیندانەكانی كۆماری ئیسلامیدان كە بەگشتی بە 70 ساڵ زیندان حوكم دراون.
