زاگرۆس پۆست
دوو ژنە چالاكی كورد كە بە تۆمەتی سیاسی لە لایەن دام و دەزگا ئەمنیەتیەكانی كۆماری ئیسلامیەوە دەستگیر كراون تا ئێستا چارەنووسیان نادیارە.
مەهناز حەكیمی ژنە چالاكی سیاسی كورد كە زیاتر لە 3 مانگە دەستگیر و رۆژی 28ی خەرمانانیش گوازرایەوە بۆ زیندانی ناوەندیی ورمێ، هەتا ئێستا چارەنووسی نادیارە.
حەكیمی بە تۆمەتی پەیوەندیی لەگەڵ یەكێك لە حیزبە كوردستانیە نەیارەكانی كۆماری ئیسلامی ئێران راگەیەندراوە و هەتا ئێستا حوكمی دیاریی نەكراوە و هەر لە چاوەڕوانیدا لە زیندانی ورمێ راگیراوە.
هەروەها ئەفسانە بایەزیدی كچە خوێندكاری كوردی 28 ساڵ تەمەنی خەڵكی شاری بۆكان كە 3 مانگ لەوەپێش و لە رێكەوتی 5ی پوشپەڕ دەستگیر و هەتا ئێستا چارەنووسی نادیارە.
ئەو كچە خوێندكارە كە شەوی ٢٣ی خەرمانان بەهۆی ١٩ رۆژ مانگرتن و لە ئەنجامدا تێكچوونی باری تەندروستییەوە بۆ نەخۆشخانەی بۆكان گوازرابوویەوە، ماوەی زیاتر لە 90 رۆژە لە ناوەندە ئەمنییەكانی بۆكان لەژێر ئەشكەنجە و لێپرسینەوەدایە.
هەتا ئێستا هیچكام هەیچكام لە كەسووكاری ئەفسانە نەیانتوانیوە چاویان بە رۆڵەكەیان بكەوێت و ئەمەش نیگەرانیی قووڵی لای بنەماڵە و كەسووكاری ئەفسانە دروست كردووە.
پیشتر دایكی ئەفسانە بۆ چاوپێكەوتن و ئاگاداربوون لە دۆخی كچەكەی، ماوەی ٥ كاتژمێر لە بەر درگای ئیدارەی ئیتلاعاتی شاری بۆكان راوەستابوو، كە سەرەڕای ئەوەی ئیزنی چاوپێكەوتنیشی پێنەدرابوو، بەرەوڕووی بێڕێزی و سووكایەتیی مەئموورانی وەزارەتی ئیتلاعات ببوویەوە.
ئەو كچە خوێندكارە كوردە ساڵی رابردووش دەستگیر كرا و دواتر لەلایەن دەزگای قەزایی كۆماری ئیسلامی ئێرانەوە حوكمی ٢ ساڵ زیندانیی هەڵپەسێردراوی بۆ بڕایەوە و دواتر بۆ درێژەدان بە خوێندن لە زانكۆی پەیام‌نووری بۆكانەوە بۆ زانكۆی پەیام‌نووری شاری مەراغە دوور خرایەوە.
