شه‌ممه‌ 27 تشرینی دووه‌م 2021
ماڵەوە / کوردستان / كوردانی نۆروێژ خۆپیشاندانێكیان بەڕێوەبرد

كوردانی نۆروێژ خۆپیشاندانێكیان بەڕێوەبرد

رۆژی سێشەممە 23ی سێپتامبری 2014ی زایینی لە لایەن بەشێك لە كوردانی نیشتەجێی وڵاتی نۆروێژ خۆپیشاندانێك بۆ پشتیوانی لە خەبات و خۆڕاكری خەڵكی رۆژئاوای كوردستان و بەتایبەت شاری كۆبانی و گریلاكانی یەپەگە و لە دژی چەكدارەكانی داعش بەڕێوەبرد.
ئەو كۆبوونەوەیە كە سەدان كەس لە كوردانی هەر چوارپارچەی كوردستان تێیدا بەشدار بوون لە لایەن لاوانی سەر بە پارتی كرێكارانی كوردستان رێكخرابوو.
لە كۆبوونەوەكەدا دروشمگەلێكی وەكوو: بژی رۆژئاوا، بژی كۆبانی، بژی بەرخۆدانی كۆبانی و ISIS تێرۆریست و توركیەی فاشیست لە لایەن بەشداربووانەوە دەوترایەوە.
دوو حیزبی چەپی نۆروێژیی لەوانە حیزبی SV  و هەروەها حیزبی ROD PARTI  بەشدارییان لە خۆپیشاندانەكەدا كرد و وتەبێژی سەرەكی خۆپیشاندانەكە بوون.
لەو كۆبوونەوەیەدا سەرۆكی حیزبی SV  حیزبی چەپی سۆسیالیستی نۆروێژ Audun Lysbakken لە بەشێك لە وتەكانیدا وێڕای دەربڕینی پشتیوانی تەواوی خۆیان لە خەبات و خۆڕاگریی خەڵكی رۆژئاوای كوردستان، سەركەوتنی ئەم خەباتە و خۆڕاگریەكەی بەرز نرخاند و وتیشی: پێشتر كەسی ئێمە بە سەردان چووەتە رۆژئاوا و بۆ كۆبانی و لە نزیكەوە ئەم خۆبەڕێوەبەرایەتیە دێمۆكراتیك و سەربەخۆیەی كۆبانی بە چاوی خۆی بینیوە.
هەروەها لە لایەن حیزبی Rød part حیزبی سووری نۆروێژ Einar Aslaksen كە وەكوو وتەبێژی حیزبەكە قسەی دەكرد، لە قسەكانیدا وێڕای پشتیوانی گەرم و گوڕ لە خەباتی خەڵكی رۆژئاوا و بەتایبەت لە شاری كۆبانیی، رەخنەی توندی ئارستەی رۆڵی نامرۆڤانە و دووبڵ موراڵی دەوڵەتی توركیە گرت و دووپاتی كردەوە كە توركەكان بە كردەوە قیزەونەكانیان دژ بە كوردان ریسواییەكیان بۆ خۆیان دروست كردووە.
هەر یەك لە نوێنەرانی پەكەكە بەشی لاوان و یەپەگە لە قسەكانیاندا بەردەوامی خۆیان بۆ پاراستنی خەڵكی رۆژئاوا و كانتۆنی كۆبانی دووپات كردەوە و رایانگەیاند كە، بە هەموو شێوازێك و بە گیانی خۆیان خەڵك و شاری كۆبانی لە دەست چەتەكانی داعش دەپارێزن و داوای هاوپشتیەكی جیهنیان كرد بۆ سەرخستنی خەبات و بەرخۆدانی كۆبانی.
لە لایەن رۆژهەڵاتیشیەوە، كۆمەڵەی زەحمەتكێشانی كوردستان یەكێك لە لایەنە بەشداربووەكانی ئەو خۆپیشاندانە بوو. لە لایەن كۆمیتەی نۆروێژی كۆمەڵەوە حسێن شەبەق لە وتەیەكدا وێڕای پارت كردنەوەی هەموو چەشنە پشتیوانی و یارمەتیەك لە لایەن كۆمەڵەوە بۆ رۆژئاوای كوردستان و بۆ شاری كۆبانی، رایگەیاند كە: كۆمەڵەی زەحمەتكێشانی كوردستان یەكەم لایەنی كوردستانی بوو كە سێ حەوتوو بەر لە ئێستا هەڤاڵانی پەكەكە و یەپەگە ی لە ەترسی هێرشی دووبارە و لە ناكاوی داعش بۆ سەر كۆبانی ئاگادار كردووەتەوە و هەر ئەو كاتیش ئامادەیی خۆی بۆ هەر چەشنە كار و یارمەتییەك دەربڕی و هەر ئێستاش بۆ هەموو چەشنە پشتیوانیەكی بەكردەوە و ناردنی هێزی پێشمەرگە ئامادەیە.
هەروەها حیزبی دێمۆكراتی كوردستانیش بە بەشداریی خۆیان لەو خۆپیشاندانە بەرینەدا، پەلاماری داعش بۆ سەر كۆبانیان مەحكوم كرد و پاڵپشتی و هاوكاریی خۆیان بۆ خەڵكی رۆژئاوا و بەرخۆدانی خەڵكی كۆبانیی پارت كردەوە.
لەو خۆپیشاندانەدا هەر یەك لە لایەنەكانی یەكێتی نیشتمانی كوردستان و بزووتنەوەی گۆڕان لە لایەن باشووری كوردستانەوە بە خوێندنەوەی وتار پتشویانی خۆیان لە خەڵكی رۆژئاوا و خەبات و خۆڕاگریی خەڵكی كۆبانی دەربڕی و رایانگەیاند كە: ئەوەی لە تواناماندا بێ بۆ كۆبانیی و خەڵكی رۆژئاوای كوردستان درێغی ناكەین.
لە كۆتاییدا دلێر ئاكرەیی لە وتەیەكدا وێڕای ئاراستە كردنی سپاس و پێزانینی خۆی بۆ سەرجەم بەشداربووانی خۆپیشاندانەكە و باس كردن لەوەیكە دوای شەنگال و كۆبانی مێژوویەكی تازە لە كوردستان لە دایك دەبێ. مێژوویەك كە هەموو كوردان دەتوانن دەستكەوتەكانی بچننەوە. ئەوەشی دووپات كردەوە كە مێژووی 20 ساڵەی باشوور نیشانی دا كە بە بازرگانی و بەرزكردنەوەی بینای گەورە و سیاسەتی ناروونی نەتەوەیی، كورد ناتوانێ پارێزگاریی لە خۆی بكات.

 

بابەتی هاوپۆل

بریندار بوونی دوو کۆڵبەر لە سنوورەکانی نەوسوود لە لایان چەکدارەکانی رژیمی ئیران

بریندار بوونی دوو کۆڵبەر لە سنوورەکانی نەوسوود لە لایان چەکدارەکانی رژیمی ئیران بە پێی ھەواڵەكان، …

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

This site uses Akismet to reduce spam. Learn how your comment data is processed.