رۆژانه مین دوو که‌س ئه‌کاته قوربانی

بوونی 16ملیۆن مینی چێنراو، رۆژانه کوژرانی دوو هاوڵاتی به مین‌و دووه‌م وڵات له جیهان دوایین زانیارییه‌کانی مینی چێنراوه له ئێران. به گوێره‌ی دوایین ئاماره‌کان له ئێران به گشتی 16ملیۆن مینی چێنراوو پووچه‌‌‌ڵنه‌کراو هه‌یه‌ که مه‌ترسی راسته‌وخۆیه بۆ گیانی هاوڵاتییان‌و ئه‌وه‌ش پله‌ی دووه‌می قوربانی گرتن به مین‌ی به‌خشیوه به‌م وڵاته.

به گوێره‌ی هه‌‌واڵه‌کان زیاترین قوربانییه‌کانی مین خه‌ڵکی ناوچه‌و ئاواییه‌کانی سه‌ر سنوورن‌و پڕمینترین ناوچه‌کانیش رۆژئاوای ئێرانه به هۆی ئه‌و مه‌یدانه مینییانه‌ی کۆماری ئیسلامی‌‌و رژیمی رووخاوی به‌عسی عێراق بۆ یه‌کیان چاندووه؛ هاوکات پارێزگاکانی رۆژهه‌ڵاتی کوردستان‌و پارێزگای عه‌ره‌ب نشینی ئه‌حواز پێنج پارێزگای پڕمینن له سه‌ر ئاستی ئێران. ده‌وترێت عێراق پڕمینترین وڵاتی جیهانه‌و وڵاتانی ئێران‌و ئه‌فغانستان‌و ئانگۆلاو کوه‌یت‌ وڵاتانی تری پڕمینن له ئاستی جیهاندا که تێیاندا رۆژانه به هۆی مینه‌وه هاوڵاتیی ده‌بێته قوربانی.