زاگرۆس پۆست
پاش ئه‌وه‌ی دوكتۆر ئه‌یمه‌ن زه‌واهیری ئه‌میری رێكخراوی قاعیده گروپی داعشی وه‌ک گروپێکی دابڕاو له رێکخراوه‌که‌ی ناو برد و رایگه‌یاند که ئه‌وان چیتر خۆیان له ئاست کارو کرده‌وه‌کانی (ده‌وڵه‌تی ئیسلامی عێراق و شام)دا به به‌رپرسیار نازانن هه‌روه‌ها پاش ئه‌وه‌ی داعش شه‌ڕی دژی جه‌بهه‌ی نوسره راگه‌یاند و ئاماده نه‌بوو بچێته ژێر سێبه‌ری ئه‌م رێکخراوه‌وه، جه‌بهه‌ی نوسره به فه‌رمی نوێنه‌رایه‌تی رێکخراوی ئه‌لقاعیده‌ی له سووریا که‌وته سه‌رشان. هه‌روه‌ها به مه‌به‌ستی سه‌رله‌نوێ دامه‌زراندنه‌وه لقی عێراقی خۆی، رێكخراوی قاعیده له سه‌ره‌تاکانی مانگی 3ی2014ه‌وه ده‌ستبه‌کار بووه‌و ماوه‌ی دوو مانگ ده‌بێ سه‌رقاڵی ئه‌مکاره‌یه.
زانیاریه‌كان باس له‌وه ده‌که‌ن که رێکخراوی قاعیده هێزه‌كانی خۆی له پارێزگای موسڵ و ئه‌نبار كۆكردۆته‌وه‌و له‌دوا دانیشتنی سه‌ركرده‌كانی ئه‌و رێكخراوه له‌شاری موسڵ بریاری راگه‌یاندنی به‌ره‌ی نوسره له‌عێراق دراوه. ئه‌مه له کاتێکدایه که ژماره‌یه‌کی زۆر له زاناو موفییه سه‌له‌فییه‌کان کاروکرده‌وه‌کانی داعش به‌تایبه‌ت شه‌ڕی ئه‌م گروپه‌یان له‌گه‌ڵ لایه‌نه ئیسلامییه‌کانی تر به‌تایبه‌ت به‌ره‌ی نوسره حه‌رام کردووه‌و داعشیان به خه‌تاکار و گێره‌شێوێن ناو بردووه. هه‌ریه‌ك له دكتۆر “طارق عبدالحلیم” ئه‌مینداری ڕه‌وتی سوننی له میسر و دكتۆر “هانی سوباعی” یاریده‌ده‌ری ئه‌و و به‌رێوبه‌ری سه‌نته‌ری لێكۆڵینه‌وه‌ی (مه‌قرێزی)، له به‌یاننامه‌یه‌كدا بێ به‌ری بونی خۆیان له داعش و هه‌ڵسوكه‌وته‌كانیان راده‌گه‌یه‌نن و ئه‌و گروپه به (خه‌واریج) و(ته‌كفیری) ناو ده‌به‌ن.
هه‌ردوو شێخی ناسراوی ناو ره‌وتی سه‌له‌فی جیهادی رایده‌گه‌یه‌نن: (دوای ئه‌وه‌ی هه‌وڵێكی زۆرمان دا تاکوو (فیتنه)و كێشه‌ی ناو گروپه جیهادیه‌كانی شام بوه‌ستێنین،” ئه‌بوو موحه‌ممه‌دی عه‌دنانی” ووته‌بێژی داعش تووشی ناهومێدی و سه‌رسووڕمانی کردین کاتێ وێنه‌ی “زه‌وابیری” سه‌ركرده‌ی “جه‌ماعه‌ی ئیسلامی جه‌زائیری موسه‌له‌ح” بێ شه‌رمانه ئه‌و هه‌موو درۆیه ده‌كات و بوختان به‌ده‌م سه‌ركرده جیهادیه‌كانه‌وه ده‌كات و ته‌كفیری كه‌سایه‌تیه‌كی وه‌ك دكتۆر ئه‌یمه‌ن زه‌واهیری وشێخ ئوسامه بن لادن ده‌كه‌ن. گروپی داعش له توندڕه‌وی و”غلو”دا پێش “قه‌رامیته”و “ئیسماعیلیه”و “حه‌شاشه‌كان” كه‌وتون و له دروستكردنی ترس و تۆقاندن له ئاستی دونیای ئیسلامیدا هه‌روه‌ها كوشتن و تیرۆركردنی سه‌ركرده جیهادیه‌كان و موسڵماناندا به‌هه‌مان شێوازی ئه‌وان جووڵاونه‌ته‌وه‌و ره‌فتاریان کردووه. ئه‌و قسانه‌ی عه‌دنانی ووته‌بێژی داعش ده‌یكات زیاتر له قسه‌ی منداڵێکی کاڵ فام و هه‌رزه ده‌چێت تا قسه‌ی ووته‌بێژی ده‌وڵه‌تێك یان رێکخراوێکی ئیسلامی. قسه‌گه‌لێک که زیاتر تۆوی دووبه‌ره‌کی ده‌چێنێت و ده‌بێته هانده‌ری چه‌کدارانی داعش بۆ چوونه شه‌ڕی برموسوڵمانه‌کانیان وشه‌ڕو كوشتاری موسڵمانان و به‌گشتی دووبه‌ره‌كی نانه‌وه له‌نێوان ئه‌واندا.
هه‌ردوو شێخی ناوبراو داوا له سه‌رجه‌م لاوان وپیاوانی ئومه‌تی ئیسلامی ده‌كه‌ن له ریزه‌كانی ئه‌و گروپه دوور بكه‌ونه‌وه‌و (غه‌درو خیانه‌ت به‌رانبه‌ر ئه‌هلی ئیسلام نه‌كه‌ن و به ووشه رازاوەكانیان هه‌ڵنه‌خه‌ڵه‌تێن). هه‌روه‌ها داواش له سه‌رانی داعش ده‌كه‌ن و ده‌ڵێن: (له‌خوا بترسێن وبگه‌رێنه‌وه سه‌ر رێگه‌ی حه‌ق و چیتر گه‌نجی ئه‌م ئوممه‌ته ره‌وانه‌ی جه‌هه‌ننه‌م مه‌که‌ن!!!)
له لایه‌کی تروه “ئه‌بو به‌كری به‌غدادی” ئه‌میری رێكخراوی ده‌وڵه‌تی ئیسلامی له عێراق و شام به بڵاوكردنه‌وه‌ی تۆمارێكی ده‌نگی، به‌نیسبه‌ت ڕووداوه‌كانی شامه‌وه دێته ده‌نگ و ئاماژه به بونی پیلانێكی نه‌خوازراو به‌رانبه‌ر به رێكخراوه‌كه‌ی ده‌كات و رایده‌گه‌یه‌نێت: (زۆر هه‌وڵمانداوه خۆمان له‌و شه‌ڕه بپارێزین كه به‌ناحه‌ق توشمان كراوه به‌ڵام له لایه‌ن هه‌ندێ لایه‌نه‌وه ناچار كراین شه‌ڕ بکه‌ین. ئێمه ده‌زانین ته‌نها لایه‌نێك كه سوود له‌و شه‌ڕه ده‌بات رژێمی به‌شار ئه‌سه‌ده به‌ڵام به ناچاری و نابه‌دڵی په‌لكێشی ناو ئه‌و شه‌ڕه كراوین و ئێمه هیچ ته‌قسیر و تاوانێکمان نییه).
هه‌نووکه له سووریا شه‌ڕی نێوان داعش و جه‌بهه‌ی نوسره گه‌رمه‌و وه‌ک خۆشیان باسی ده‌که‌ن ئه‌م شه‌ڕه زیاتر له به‌رژه‌وه‌ندی به‌شار ئه‌سه‌ددایه به‌ڵام هه‌رکام له‌و لایه‌نانه واته داعش و به‌ره‌ی نوسره خۆیان به خاوه‌نی راسته‌قینه‌ی ناوچه ئازادکراوه‌کانی سووریا ده‌زانن و به‌تایبه‌ت شه‌ڕی ئه‌وان له‌سه‌ر چاڵه نه‌وته‌کان و سه‌رچاوه پڕداهاته‌کانی تره که له ده‌ستی به‌شار ئه‌سه‌ددا نه‌ماون. خه‌ریکه بارودۆخه‌که به ئاقارێکدا بڕوات که که‌لێنێکی گه‌وره بکه‌وێته ناو بزووتنه‌وه‌ی سه‌له‌فییه‌تی جیهادیی جیهانییه‌وه.
ئه‌لقاعیده به‌هه‌موو شێوه‌یه‌ک هه‌وڵی کۆنترۆڵکردنی وه‌زعه‌که‌و زاڵکردنه‌وه‌ی هه‌یبه‌ت‌و هه‌یمه‌نه‌ی خۆی ئه‌دات و دامه‌زراندنی لقی جه‌بهه‌ی نوسره‌ش له عێراق به‌هه‌مان ئاراسته‌دایه به‌ڵام داعشیش جگه له عێراق که به ئاسانی ته‌ڕاتێنی پیادا ده‌کات و خاوه‌ن پێگه‌یه‌کی به‌هێزه له‌ناو سوننه‌کانی ئه‌م وڵاته‌دا، له سووریاش خاوه‌ن هێزێکی چه‌کداری به ئه‌زموونتر له به‌ره‌ی نوسره‌یه‌و زیاتر له به‌ره‌ی نوسره‌ش هه‌وڵێ قۆرقکردنی ده‌سه‌ڵاتی ناوچه ئازادکراوه‌کان ئه‌دات. بۆیه له داهاتوودا شاهێدی زیاتر ئاڵۆزبوونی پێوه‌ندییه‌کانی داعش و ئه‌لقاعیده هه‌م له سووریاو هه‌م له عێراق و هه‌میش له ئاستێکی به‌ربڵاوتردا ده‌بین. بێگومان ئه‌گه‌ر سوڵح و ئاشته‌واییه‌ک له‌نێوان ئه‌م دووانه‌دا نه‌یه‌ته ئاراوه ئه‌وا شه‌ڕو توندووتیژییه‌کانی نێوانیان هاوکێشه‌کان یه‌کلایی ده‌که‌نه‌وه‌و دیاریی ده‌که‌ن که کامه هێز له مه‌یداندا ئه‌مێنێته‌وه.
