زاگرۆس پۆست
ژنێك لە شاری نەغەدە لە لایەن هاوسەرەكەیەوە درایە بەر زەبری چەقۆ و كوژرا.
بە پێی راپۆرتی باسنیوز، دوێنێ شەممە 23ی مانگی جۆزەردان، ژنێكی خەڵكی شاری نەغەدە بە ناوی “قومری” 36 ساڵ تەمەن و كچی ئیسماعیل، لە لایەن هاوسەرەكەیەوە بە ناوی “رەسووڵ” درایە بەر زەبری چەقۆ و گیانی لەدەستدا.
ئەو ژنە ماوەی یەك ساڵە لەگەڵ خەسووی كێشەی هەبووە و بە هۆیەوە چەندین جار ماڵی هاوسەرەكەی بەجێهێشتووە و گەڕاوەتەوە بۆ ماڵی باوكی.
دەوترێ قومری رۆژی رابردوو لەگەڵ خەسووی تووشی شەڕ و دەمەقاڵە هاتووە و كاتێ مێردەكەی هاتووەتە سەر شەڕەكەیاندا، بە چەقۆ هێرش دەكاتە سەر ژنەكەی و بە زەبری چەقۆ دەیكوژێت و لە ماڵەكە هەڵدێت.
كێشە كۆمەڵایەتییەكان و بەتایبەت كێشە بنەماڵەییەكان لە رۆژهەڵاتی كوردستان و ئێران بە هۆی قەیراناویی بوونی دۆخی كۆمەڵگاكەوە بە ئاستێكی زۆر پەرەی سەندووە و ئەم كێشەگەلە زۆرجار قوربانیی گیانیی لەمچەشنەی لێدەكەوێتەوە.
