لاوێكی كورد لە شاری دیواندەرە بە هۆی خۆكوژییەوە گیانی لەدەستدا

لاوێكی خەڵكی شاری دیواندەرە دەستی دایە خۆكوژیی و بەوبۆنەوە گیانی لەدەستدا.

بە پێی هەواڵی گەیشتوو بە “زاگرۆس پۆست”، رۆژی چوارشەممە 20ی مانگی جۆزەردان لاوێكی تەمەن 19 ساڵ بە ناوی “هادی حەیدەری” خەڵكی ئاوایی “گوڵانە” لە ناوچەی “قاڵ قاڵی” شاری دیواندەرە لە رێگای خۆكوژییەوە دەستی داوەتە خۆكوژیی و گیانی لەدەستداوە.

تا ئێستا هۆكاری خۆكوژیی ناوبراو نادیارە و بنەماڵەكەشی لەمبارەوە بە هەواڵنێریی “زاگرۆس پۆست”یان راگەیاندووە، كە هۆكاری ئەم كارەی رۆڵەكەیان نازانن و كاتێ ئەو دەستی داوەتە خۆكوژیی، ئەوان لە ماڵەوە نەبوون و لە سەر موچە و مەزراكانیان سەرقاڵی كاركردن بوون.

شایانی باسە، لە ناوچە جیاجیاكانی رۆژهەڵاتی كوردستان كێشە و گرفتە كۆمەڵایەتییەكان و لەوانە خۆكوژیی بە ئاستێكی سەرسوڕهێنەر زیادی كردووە و بە پێی ئامارە فەرمیەكانی خودی حكومەت، رۆژانە 11 كەس لە ئێران بە هۆی خۆكوژییەوە گیانیان لەدەست دەدەن.