زاگرۆس پۆست
لە ماوەی یەك هەفتەی رابردوو 2 نووسەر و رۆژنامەوانی ناسراوی خەڵكی شاری مەهاباد كۆچیی دواییان كرد.
سەرلەبەیانیی ئەمڕۆ چوارشەممە 20ی مانگی جۆزەردان “ئەحمەد شەریفی” ڕۆژنامەنووس، نووسەر و لێكۆڵەری مێژوو، لە نەخۆشخانەیەكی شاری مهاباد كۆچی دوایی كرد.
ناوبراو زیاتر لە نیو سەدەیە لە بواری ڕۆژنامەنووسیدا چالاكە و ئەزموونی كاركردن لە دەنگ و ڕەنگی مهاباد و بەشی كوردی ڕادیۆ كرماشان و هەروەها پێشینەیەكی دوورودریژ لە وتارنووسین بۆ بڵاوكراوە كوردییەكان بۆ وێنە گۆڤاری سروە و مهابادی هەبوو.
ئەحمەد شەریفی، وەرگێڕ و لێكۆڵەری مێژووش بوو و لەم بوارەدا كۆمەڵێك نووسراوەی لەپاش بەجێماوە.
جێگای ئاماژەیە، ڕۆژی یەكشەممە 17ی مانگی جۆزەردانیش “ئەحمەد قازیی” نووسەر، وەرگێڕ و سەرنووسەری گۆڤاری “سروە” كۆچی دوایی كردبوو و تەرمەكەی ڕۆژێك دواتر لە گۆڕستانی “بوداغ سوڵتان” لە شاری مهاباد بەخاك سپێردرابوو.
