زاگرۆس پۆست
رۆژنامەی ئیسرائیلی “یەدیعوت ئەلحەرنوت” لە زاری كاربەدەستێكی نیزامییەوە باسی لەوە كردووە كە رێژەی كوژراوانی حیزبوڵڵای لوبان لە سوریە گەیشتووەتە 2000 كەس. بە وتەی ئەم رۆژنامەیە تەنیا لە ماوەی دوو هەفتەی رابردوو 100 كەس لە قەلمونی سوریە كوژراون.
ئەم كاربەدەستە نیزامیەی ئیسرائیل وتوویەتی كە وتاردانەكانی ئەم دواییانەی حەسەن نەسرۆڵڵا رێبەری حیزبوڵڵای لوبنان لە ئاكامی گوشاری زۆری بنەماڵەی كوژراوەكان بووە، چوونكە ئەوان نەسروڵڵا بە لایەنگری رژیمی بەشار ئەسەد دەزانن.
هەندێ لە لێكۆڵەران دەڵێن: زۆبوونی رێژەی كوژراوانی حیزبوڵڵای لوبنان لە سوریە لە ئاكامی گرتنە پێشی تاكتیكی نوێ لە لایەن نەیاران و بەتایبەت هێرشە لەناكاو و خێراكانەوە بووە.
بە پێی ئەم راپۆرتە، هەندێ لە گرووپە چەكدارەكانی نەیاری ئەسەد شەڕی كلاسیك و راستەوخۆ لەگەڵ حیزبوڵڵایان واز لێهێناوە و دەستیان كردووەتە هێرشگەلێكی لەناكاو.
ئەو رۆژنامە ئیسرائیلیە لە زاری ئەفسەرێكی پلەبەرزی سوریەوە باسی لە گەیشتنی هەزاران چەكداری ئێرانی وعێراقی بە مەبەستی پێشگرتن لە داگیركردنی دەمیشق كردووە.
“یەدیعوت ئەحرنوت” وتوویەتی كە هەندێ لە راپۆرتەكان دەریدەخات كە حیزبوڵڵا بەهۆی تێكچوونی هێزەكانی رژیمی ئەسەد لە ژێر گوشاردان.
بە پێی وتەی ئەم سەرچاوە نیزامییەی ئیسرائیل “یەدیعوت ئەحرنوت” باسی لەوە كردووە، حیزبوڵڵا ژماری هێزەكانی خۆی لە سووریە گەیاندووەتە 8 هەزار كەس.
