زاگرۆس پۆست
لە ماوەی رۆژانی رابردوو لە زیندانەكانی كۆماری ئیسلامی 9 كەسی دیكە لەسێدارە دراون.
بە پێی راپۆرتی هرانا، رۆژی یەكشەممە 20 مانگی گوڵان 4 كەس بە تۆمەتی دزیی كردن بە چەك و رۆژی سێشەممەش 22ی گوڵان 3 كەسی دیكە بە تاوانی ئەنجامدانی قەتڵ، لە زیندانی عاڵ ئابادی شیراز لەسێدارە دراون.
هەروەها هەواڵنێرییە حكومەتییەكانی ئێران ئاشكرایان كرد، لە ماوەی رۆژانی رابردوو كەسێك بە تاوانی دەستدرێژیی سێكسی و ئەنجامدانی قەتڵ لە زیندانی قەزوین و كەسێكی دیكەش لە پەیوەند لەگەڵ دۆسیەی كوشتنی 2 كەس بە چەك، لە زیندانی مەشهەد ئێعدام كران.
دەبێ بوترێ، پاش رێكەوتنە ئەتۆمیەكەی نێوان كۆماری ئیسلامی و گرووپی پێنج زێدە یەك لە لۆزانی سویس، رێژەی ئێعدامی هاوڵاتییانی ئێرانی بە ئاستێكی بەرچاو پەرەی سەندووە و لە ماوەی نزیك بە 2 مانگی رابردوو لانیكەم 150 كەس لە زیندانە جیاجیاكانی ئێران لەسێدارە دراون.
