دوو بەندكراوی كورد لە زیندان خۆیان دەربازكرد

بە پێی هەواڵێكە لە كەمپەینی بەرگری لە زیندانیانی سیاسی‌و مەدەنی بڵاو بوەتەوە، شەوی دووشەممە 2ی بەفرانبار دوو بەندكراوی سیاسی لە زیندانی شاری سەردەشت توانیان خۆیان رزگار بكەن.
دوو بەندكراوی سیاسی بە ناوەكانی ئومید بەیگزادە‌و مێهدی خزری كە پاش تێكهەڵچوونی هاوینی ئەمساڵ لە نێوان هێزەكانی كۆماری ئیسلامی‌و ئەندامی یەكێك لە حیزبە كوردیەكان لە ئاوایی مارغانی سەردەشت دەسبەسەر كرابوون، توانیان خۆیان لە زیندان دەرباز بكەن.
ئەمە لە حاڵێكدایە كە لاوێكی دیكە بە ناوی ناسر كەریمی هاوڕێ لەگەڵ ئەو دوو بەندكراوە دەسبەسەركرابوو بەڵام لە كاتی خۆدەربازكردنی ئەو دوو بەندكراوە ناسر كەریمی نەیتوانی خۆی لە دەست مەئموران رزگار بكات.
بە پێی وتەی شایەحاڵەكان، پاش هەڵاتن‌و خۆدەربازكردنی ئەو دوو بەندكراوە سیاسیە كەش‌و هەوای شاری سەردەشت بە تەواوی ئەمنیەتیە‌و هێزەكانی رژیم بە شێوەیەكی بەربڵاو بە ناو شاردا دەسووڕێنەوە.