زاگرۆس پۆست
زۆربەی هەرە زۆری مامۆستایانی كوردستان و ئێران بۆ جارێكی دیكە و بۆ كۆتایی هێنان بە هەڵاواردن و دەستڕاگەیشتن بە مافەكانی خۆیان دەستیان دایە رێكخستنی مانگرتنی ناڕەزاییانە.
بە پێی راپۆرتی “زاگرۆس پۆست”، ئەمرۆ پێنج‌شەممە ٢٧ی مانگی خاكەلێوە، لە زۆربەی هەرە زۆری شارەكانی ئێران و بەتایبەت شارەكانی كوردستان، مامۆستایانی ناڕازیی بە هەڵكردنی پلاكارد و نووسراوە دەستیان دایە رێكخستنی مانگرتن و كۆبوونەوەی بەرفراوان.
جێبەجێ كردنی پەسندكراوی “زیادكردنی حەقدەستی كارمەندانی دەوڵەت” و كۆتایی هێنان بە پەراوێز خستن و هەڵاواردنی مامۆستایان، خوێندنی قوتابیان بە زمانی زگماكی، خواستە سەرەكیەكانی مامۆستیانی ناڕازیی بوو.
مامۆستایانی ناڕازیی خوازیاری ئەوەن كە لە ئەمساڵەوە بە ئاستی 70% حەقدەستەكانیان زیاد بكرێت و ئەو حەقدەستی كە ئێستا لە لایەن وەزارەتی پەروەردەوە پێیان دەدرێت، وەڵامدەری بژیوی ژیانیان ناكات.
جێگای وەبیرهێنانەوەیە، ماوەیەك لەوەپێش ناوەندی پیشەیی مامۆستایانی ئێران بە دەركردنی راگەیەندراوێك خوازیاری كۆبوونەوەی ناڕازییانەی مامۆستایانی ئێران و بوو و هەر لەو پەیوەندەشدا ژمارەیەكی زۆر لە مامۆستایان بەرەوڕووی هەڕەشە و گوڕەشەی ناوەندە حكومەتییەكان بوون و هەروەها مامۆستایانی دوو جاری دیكە و لە رێكەوتی ٣ و ١٠ی رەشەمەی ساڵی 1393ی هەتاوییش بە مەبەستی دەستڕاگەیشتن بە خواست و داواكارییە پیشەییەكانی خۆیان رژانە سەرشەقام و لە بەردەم ناوەندەكانی پەروەردەی شارەكانی خۆیان كۆبوونەوە، بەڵام تا ئێستا چكۆلەترین خواستی مامۆستایان نەچووەتە قۆناغی جێبەجێ كردنەوە.
