زاگرۆس پۆست
كچێكی خەڵكی ناوچەی بانە بەهۆی كێشەی بنەماڵەیی و كۆمەڵایەتیی لە رێگای خۆی هەڵواسیەوە دەستی داوەتە خۆكوژی و كۆتاییی بەژیانی خۆی هێناوە.
بە پێی راپۆرتی “زاگرۆس پۆست”، لە ماوەی رۆژانی دواییدا كچێك بە ناوی “ئەسمەر” تەمەنی 19 ساڵ بە هۆی كێشەی بنەماڵەیی و كۆمەڵایەتییەوە لە رێگای خۆهەڵواسینەوە دەستی داوەتە خۆكوژیی و لە ئاكامدا گیانی لەدەستداوە.
دەوترێ ئەسمەر لەگەڵ كوڕێك پەیوەندیی سۆزداریی بووە و بەوبۆنەوە لە لایەن باك و براكەوەیەوە پیش لە چوونەوەی بۆ قوتابخانە گرتووە و هەر ئەمەش بووەتە هۆی سەرهەڵدانی ناكۆكی و بارگرژی لە نێو ئەو بنەماڵەیەدا.
كچەكە دواتر بە هۆی زەخت و گوشارەكانی سەری هەڕەشەی خۆسووتاندنی كردووە، بەڵام دواتر لە رێگای خۆهەڵواسینەوە كۆتایی بە ژیانی هێناوە و بنەماڵەكەشی هەڕەشەیان لە كوڕە خۆشەویستەكەی كردووە و ناوبراویش لە ترسی گیانی لە شاری بانە هەڵاتووە و هەتا ئێستا بێ سەروشوێنە.
شایانی باسە، هێشتاكە هەندێ لە بنەماڵەكان بە هۆی نەریتی بوون و پیاوسالاری پێش بە پەیوەندیی رۆڵەكانیان و بەتایبەت كچان دەگرن و زۆر جار ئەم زەخت و گوشارانە لادان و كێشەی كۆمەڵایەتی مەترسیدار و لە ئاكامیشدا خۆكوشتن و مەرگی كەسەكانی لێ دەكەوێتەوە.
