زاگرۆس پۆست
سەرۆكی ئیدارەی تۆماركردنی باری كەسێتی لە شاری سەردەشت وتی: ئاستی تەڵاق لەو شارە لە ساڵی رابردوو لە بەراوەرد لەگەڵ ساڵێك پێشتر بە ئاستی 31.6% بەرزبوونەوەی بەخۆیەوە بینیوە.
سلێمان كاوە ئەمڕۆ یەكشەممە 16ی مانگی خاكەلێوە لە درێژەی وتووێژ لەگەڵ هەواڵنێریی حكومەتیی ئیرنا وتی: ئەم ئامارە لە نێوشاردا 41.8% و لە گوندەكانیشدا 9.5% بووە.
ناوبراو هەروەها وتی: لە ساڵی 93 لەو شارە بەگشتی 175 حاڵەت تەڵاق تۆمار كراوە، كە 129 حاڵەت لە نێو شارەكەدا و 46 حاڵەتیش لە گوندەكاندا بووە.
كاوە هەروەها وتی: ئەمە لەحاڵێكدایە كە لە ساڵی 92 بەگشتی 133 حاڵەت تەڵاق لەو شارە تۆمار كرابوو.
سەرۆكی ئیدارەی تۆماركردنی باری كەسێتی لە شاری سەردەشت سەبارەت بە رێژەی هاوسەرگیری لەو شارە وتی: ساڵی رابردوو بەگشتی یەك هەزار و 693 حاڵەت هاوسەرگیری تۆماركراوە، كە ئەو رێژەیە بە بەراوەرد لەگەڵ ساڵێك پێشتر 11.6% بەرزبوونەوەی بەخۆیەوە بینیوە.
هەروەها وتیشی: لە رێژەیە 898 حاڵەت لە ناوچە شاریەكان و 795 حاڵەتیش لە گوندەكاندا بووە.
كاوە سەبارەت بە رێژەی لەدایكبوون و مردن لەو شارە وتی: 3 هەزارو 313 حاڵەت لەدایكبوون و مردن روویداوە كە 2 هەزارو 757 كەس لەدایكبوون و 565 كەسیش مردوون.
ناوبراو هەروەها لە درێژەدا وتی: لە كۆی ئەو منداڵانە كە لەدایكبوون هەزار و 565 كەس لە شار و هەزار و 192 كەسیش لە ئاواییەكاندا لەدایك بوون، كە لەو رێژەیە 1393 منداڵی كوڕ و 1364 منداڵیش كچ بوون.
هەروەها تیشكی خستە سەر ئەوەیكە: منداڵانی كوڕ بە ناوی محەمەد بە 294 حاڵەت و كچانیش بە ناوی بارانەوە 47 حاڵەت زۆرترین رێژەی ناوەكانیان بەخۆیانەوە تەرخان كردووە.
كاوە وتیشی: لە ساڵی نوێدا یەكەم منداڵی كوڕ بە ناوی بێنیامین و یەكەمین كچیش بە ناوی مێهرەبانەوە ناو نراون.
سەرۆكی ئیدارەی تۆماركردنی باری كەسێتی سەردەشت وتیشی: لە رێژەی 565 حاڵەت مردن كە لەو شارە تۆمار كراوە 291 حاڵەت لە ناوچە شاریەكان و 265 حاڵەتیش لە گوندەكاندا بووە.
شایانی باسە، هەژاری و بێكاری لاوان لە ئێران و بەتایبەت رۆژهەڵاتی كوردستان بووەتە هۆی ئەوەیكە، كەمترین حاڵەتی هاوسەرگیری رووبدات و یان لە ماوەیەكی كەمدا بە جیابوونەوەدا بكێشرێت، ئەمەش لە روانگەی كارناسانی كۆمەڵایەتیەوە وەكوو کێشه و دیاردەیەكی بەرچاوی كۆمەڵایەتی دێتە ئەژمار كە حكومەت كەمترین هەوڵ بۆ بنەبڕكردنی ئەم دیاردەیە ناخاتە گەڕ.
