بە سەدان شاری ئێران بەرەوڕووی قەیرانی كەم ئاوی بوونەتەوە

جێگری وەزیری وزەی كۆماری ئیسلامی رایگەیاندووە، بەپێی ئەو پێشبینیانەی كە كراوە نزیكەی 550 شاری ئێران تووشی قەیرانی كەم ئاوی بوونەتەوە و ئەمەش دگەڕێتەوە بۆ هۆكاری وشكەساڵی و نەبوونی پلانی تۆكمەی حكوومەت.

“حەمیدڕەزا جانباز” بە هەواڵنێریی حكومەتیی ئیرنای راگەیاندووە، 547 شاری ئێران تووشی قەیرانی كەم ئاوی بوونە و بەتایبەت 3 شاری “بەندەرعەباس، سنە و كرمان” لەبواری ئاوی خواردنەوەوە لە دۆخێكی زۆر خراپ دان و زیاتر لە 40%ی ئاوی تارانیش پیسە.

جانباز ئاماژەی بەوەش كردووە، كەمبوونەوەی 19%ی رێژەی باران بارین لە زۆربەی ناوچەكان هۆكاری قەیرانی كەم ئاوییە و 500 ملیۆن دۆلار لە سندووقی گەشی میللی بۆ وەگەڕخستنی كۆمەڵگای گەیاندنی ئاو بۆ گوندەكان تەرخان كراوە، بەڵام بێ‌ پلانی و نەبوونی پسپۆڕ رێگرە لەبەردەم جێبەجێ كردنی ئەو گەڵاڵەیەدا.

بە وتەی پارێزگاری شاری كرمان، ئەو پارێزگایە لانیكەم 11%ی لێڕەوار و 10%ی شینایی ئێرانی پێكهێناوە، بەڵام مەترسیی لەناوچوونی لێڕەوار و دارستانەكان روویان لە زیادبوون كردووە و وتیشی: 700 هەزار هێكتار لە لێڕەوارەكان بەهۆی نەبوونی ئاو و وشكەساڵی مەترسیی لەناوچوونیا لەسەرە.

بەپێی توێژینەوەی زانا و پسپۆڕە سروشتی و ژینگەپارێزەكان ماوەی چەند ساڵێكە شەپۆلێكی بەرینی وشكە ساڵی رووی لە ئێران كردووە و لە چەند ساڵی دااتوودا ئەم مەترسییانە دەبنە قەیرانێكی قووڵی كەم ئاوی.

ئەم مەترسی و قەیرانی كەم ئاوییە و ژینگەی ئێران لە كاتێك دایە كە لە بوودجەی ساڵی داهاتووی ئێراندا بووژاەوەی سروشتی و ژینگەیی لابراوە.