زاگرۆس پۆست
مامۆستایانی شاری مەریوان بۆ جارێكی دیكە دەستیان دایە مانگرتن و كۆبوونەوەی ناڕەزایی دەربڕین.
بە پێی هەواڵی گەیشتوو بە “زاگرۆس پۆست”، ئەمڕۆ دووشەممە 7ی مانگی رێبەندان بۆ جاری چەندم لە ماوەی یەك هەفتەی رابردوو مامۆستایانی شاری مەریوان دەستیان دایە مانگرتن و ناڕەزایی دەربڕین و لە بەردەم ئیدارەی پەروەردەی ئەو شارە و پێداگرییان لەسەر دەستڕاگەیشتن بە خواست و داواكارییەكانیان بوون.
بە پێی وتەی یەكێك لەو مامۆستایانە، كۆبوونەوەكە بە بەشداریی ژمارەیەكی زۆر لە مامۆستایانی ژن و پیاو بەڕێوە چووە و سەرەكیترین خواستی مامۆستایان پێدانی حەقدەستی بەرابەر بە مامۆستایانی ژن و پیاو بووە و هەر لەو كۆبوونەوەشدا بەرامبەر بە كەمتەرخەمی و گوێ نەدان بە داواكارییەكانی مامۆستایان لە لایەن ئیدارەی پەروەردەوە ناڕەزاییان دەربڕیوە.
جێگای وەبیرهێنانەوەیە، رۆژانی سێشەممە و چوارشەممەی هەفتەی رابردووش لە زۆربەی هەرەزۆری مامۆستایان لە شارە جیاجیاكانی رۆژهەڵاتی كوردستان و ئێران بە نیشانەی ناڕەزایی بە سیستمی پەروەردە و راهێنانی كۆماری ئیسلامی و نەدانی حەقدەست و خزمەتگوزاریی گونجاو بە مامۆستایان، كۆبوونەوەگەلێكیان بەڕێوە برد و لە چوون بۆ سەر پۆلەكانی خوێندن خۆیان بوارد.
