زاگرۆس پۆست
چەند كەسێكی سەر بە ئیدارەی ئیتلاعاتی شاری “سەردەشت” كێشە بۆ خەڵكی شارەكە دروست دەكەن و ئەمەش نیگەرانی و ناڕەزایی هاوڵاتییانی لێ كەوتووەتەوە.
بە پێی هەواڵی گەیشتوو بە “زاگرۆس پۆست”، چەند ئەندامێكی ئیدارەی ئیتلاعات لە شاری “سەردەشت” وێڕانی نانەوەی كێشە بۆ خەڵكی شارەكە، زۆر جار ئازار و ئەزیەتی هاوڵاتییان دەدەن و ئەوەش بووەتە هۆی ئەوەیكە، هاوڵاتییان سكاڵا لە سەر کەسەکان تۆمار بكەن، بەڵام لایەنە پەیوەندیدارەكان لەبەر خۆشخزمەتیەكانی ئەو كەسانە به حكومەت، هیچ ئاوڕێك لە خواست و داواكارییەكانی هاوڵاتییان نادەنەوە.
یەكێك لە دانیشتووانی شاری “سەردەشت” كە ناوی ئەو كەسانەی بۆ “زاگرۆس پۆست” ئاشكرا كردووە و رایگەیاندووە: كەسانێك بە ناوەكانی ” ش ع، ج ب، ع ش، ح ق و هەروەها كەسێك بە ناوی ئازاد” كە هەموویان بۆ ئەندامێكی پلەبەرزی ئیدارەی ئیتلاعات بە ناوی “ئەنوەر” كار دەكەن، زۆر جار كێشە و ئاژاوە بۆ هاوڵاتییان ساز دەكەن و ئەمەش نیگەرانی و ناڕەزایی خەڵكی لێكەوتووەتەوە و تەنانەت زۆر جار لەبەر ئەوەیكە حكومەت هیچ دژكردەوەیەكی بەرامبەر بەو كەسانە نەبووە، خەڵكی خۆیان دەستەویەخەی كەسەكان بووەنەتەوە و لە ئاكامیشدا تۆمەتی جۆراوجۆری سیاسی و ئاژاوێگڕیی دراوەتە پاڵیان.
ئەو هاوڵاتییە باس لەوەش دەكات، “ئەنوەر” چەند جارێك بە مەبەستی سیخوڕی سەردانی هەرێمی كوردستانی كردووە و هەواڵ و زانیاریی كۆكردووەتەوە و هەروەها مەئموریەتی بۆ ئیدارەی ئیتلاعات ئەنجامداوە.
شایانی باسە، دەستوپەیوەندەكانی كۆماری ئیسلامی لە شار و ناوچە جیاجیاكانی كوردستان زۆر جار كێشە و گرفت بۆ هاوڵاتییان دروست دەكەن و وێڕای سكاڵای خەڵك لەو كەسانە، بەڵام هیچ لایەنێك لەو بارەوە بەرپرسیار نیە و ئەوانیش بە كەیفی خۆیان ئازار و ئەزیەتی دانیشتووانی ناوچەكە دەکەن.
