زاگرۆس پۆست
جێگری فەنی ناوەندی بێهداشتی پارێزگای ورمێ رایگەیان: پەرەسەندن و بڵاوبوونەوەی نەخۆشی جۆراوجۆر لە وڵاتانی دراوسێ و كەم بوونی چەندایەتی و چۆنایەتی خزمەتگوزاریە بێهداشتیەكان، بووەتە هۆی پەرەسەندنی نەخۆشی مەترسیدار و ئەمەش وامان لێ دەكات، كە بە وریایەكی زۆرترەوە بەرەوڕووی ئەو مەترسیانە ببینەوە.
دوكتۆر “رەسوڵ ئێنتزار مێهدی” سەبارەت بە هەڕەشەكانی سەر پارێزگای ورمێ سەبارەت بە گیرۆدەبوون وتی: گەورەترین كار خۆپاراستنە و دەشڵێ ئێستاكە ئاماری نەخۆشی ئیدز لەو پارێزگایە بەرز بووەتەوە و گەیشتووەتە 145 حاڵەت.
پێشینەی دۆزینەوەی ڤیروسی نەخۆشی ئیدز لە پارێزگای ورمێ دەگەڕێتەوە بۆ ساڵی 1366ی هەتاویی كە پیاوێكی 38 ساڵ تەمەن بەو هۆیەوە گیانی لەدەستدا.
ناوبراو لە درێژەشدا دەڵێ: 5% گیرۆدەبووان بە نەخۆشی ئیدز كەمتر لە 34 ساڵ تەمەنیان هەیە و 4% گیرۆدەبووانیش سەرەوەی 50 ساڵ تەمەنیان هەیە. لەو رێژەیەش 37% هاوسەرگیرییان كردووە، 25% هێشتا ژیانی هاوبەشیان پێكنەهێناوە و 17% جیا بوونەتەوە.
شایانی باسە، ئێستاكە نزیك بە 25 هەزار كەسی گیرۆدە بە نەخۆشی ئیدز لە ئێراندا بوونی هەیە، كە لەو رێژەیە زیاتر لە 46% تەمەنیان كەمتر لە 36 ساڵدایە و زۆربەیان لە رێگای بەكارهێنانی ئامپولی بەكارهاتوو بە مەبەستی تەزرێقی مادەی هۆشبەرەوە گیرۆدەی ئەو نەخۆشیە كوشندەیە بوون و دەوڵەتیش چارەسەرێكی لەبار و كاریگەریی بۆ پێشگیریی لەو بابەتە نیە.
