زاگرۆس پۆست
لە ماوەی رۆژانی رابردوو چەند كەسێكی لیباس شەخسی سەر بە وەزارەتی ئیتلاعاتی كۆماری ئیسلامی، لە شاری “سەقز” دەستیان داوەتە كۆكردنەوەی ماهوارە و كەرەستەی پەیوەندیدار بە ماهوارە.
بە پێی هەواڵی گەیشتوو بە “زاگرۆس پۆست”، رۆژی دووشممە 1ی مانگی بەفرانبار ژمارەیەك لە هێزە لیباسشەخسیەكانی كۆماری ئیسلامی لە شاری سەقز دەستیان كردووەتە كۆكردنەوەی ماهوارە و لە گەڕەگەكانی “بیمارستان خومەینی، پاركی لالە و دەوروبەری شارەوانی و هەروەها لە چەند ئاواییەكی سەر بەو شارەش دیش و رێسیوێری ماهوارە كۆكراوەتەوە.
لەو هێرشەدا كە هێزە لیباس شەخسیەكان بە هاوكاریی بەسیج و هێزە ئینتزامیەكان ئەنجامیان داوە، لە كاتێكدا كە هاوڵاتیان خۆیان لە كردنەوەی دەرگای ماڵەكانیان دەبوارد، لە سەر دیوارەكانەوە هەڵیان دەكوتایە سەر ماڵەكانیان و كەرەسەتەكانی پەیوەندیدار بە ماهوارەیان كۆ دەكردەوە.
ئەمەش لەحاڵێكدایە، كە ناوەندی بەسیج لە شاری سەقز دەڵێ: لە ماوەی رۆژانی رابردوودا 211 ئامێریی ماهوارەیان لەو شارەدا كۆكردووەتەوە. خەڵكیش لەسەر ئەو بڕوایەدان، كە ئەو ئامێرانە دواتر بەشێكی زۆریی هەر لە لایەن ئەو هێزە حكومەتیانە بە لە بازاڕ دەفرۆشێتەوە.
پێشتریش لە شارە جیاجیاكانی كوردستان لەوانە: ئیلام، پاوە، سنە، مەریوان، سەلماس و … ئامێری ماهوارەی هاوڵاتییان لە لایەن چەكدارەكانی كۆماری ئیسلامیەوە كۆ كرابووەوە.
