زاگرۆس پۆست
چەوەندەركارانی شاری شنۆ لە ماوەی چەند رۆژی رابردوو باسیان لە وەدواخستنی حەقدەستەكانیان لە لایەن كارخانەی قەند‌و شەكەر كردووە. ماڵپەڕی شنۆ باس رایگەیاندووە، بە پێی وتەی كیشاوەرزانی ئەم بەشە.
بەرپرسانی كارخانەی قەند‌و شەكەری خۆی، ورمێ، نەغەدە‌و پیرانشار ئەمساڵ بە پێچەوانەی ساڵانی رابردوو لە دانی حەقدەست بە كیشاوەرزانی چەوەندەركار خۆیان بواردووەو بیانووی نەبوونی بووجەیان هێناوەتەوە.
یەكێك لە كیشاوەرزان كە لە ماوەی ئەمساڵ بڕی 210 تۆن چەوەندەری داوەتە كارخانەكانی قەندی نەغەدە‌و پیرانشار بە رەخنە لەم دۆخە وتوویەتی، ئەمساڵ كیشاوەزرانی شنۆ لەگەڵ كۆمەڵێك گرفتی جیددی بەرەوڕوون‌و ئەگەر دۆخەكە وەها بەرەوپێش بڕوات تووشی زیانی گەورەی ئابووری دەبن.
هاوكات بە پێی وتەی چاودێرانی ئابووری پێدەچێت كیشاوەرزان بە هۆی گرفتی ئابووری‌و نەدانی حەقدەستەكانیان لە لایەن كارخانەكان تووشی راوەستانی بەرهەمهێنان بن‌و بەردەوامبوونی ئەم دۆخەش كاریگەریی مەنفی لەسەر ژیانی كیشاوەرزانی ئەم بەشە دادەنێت.
