زاگرۆس پۆست
3 كرێكاری لاو لە شاری “سەقز” بە هۆی بەرق گرتوویی كوژراو و بریندار بوون.
بە پێی هەواڵی گەیشتوو بە *زاگرۆس پۆست*، رۆژی چوارشەممە 28ی مانگی خەزەڵوەر 3 كرێكاری لاوی خەڵكی شاری “سەقز” لە كاتی كاركردن بە ئامێری “باڵابەر” (كە بۆ بردنە سەرەوە و هێنانە خوارەوەی كەرەستەی كار كەڵكی لێ وەردەگیردرێت) لە گەڕەكی “بەهارستانی سەرۆ” بە هۆی بەرق گرتوویی 2 كەسیان گیانیان لەدەستداوە و یەكێكی دیكەشیان بە توندتی تووشی سووتان بووە.
ئەو 2 كرێكارەی كە گیانیان لەدەستداوە ناوەكانیان بریتیە لە “سامان شەریفی و سەید حەیدەر حەمزەیی” راگەیەندراوە، بەڵام شۆناسی كەسە بریندارەكە نادیارە.
جێگای باسە، دوایین ئامارەكانی دەریدەخات، كە رۆژانە 5 كرێكار لە ئێران بە هۆی رووداوی كار گیانیان لەدەست دەدەن و ساڵی رابردووش نزیك بە 13 هەزار رووداوی كار لە ئێران روویداوە كە بووەتە هۆی گیانلەدەستدانی هەزار و 800 كرێكار و زۆربەی ئەو كەسانەش كە لە رووداوەكانی كاردا گیانیان لەدەست دەدەن، كرێكارانی بەشی بیناسازیی پێكی دەهێنن.
