زاگرۆس پۆست
بە هۆی شكانی “شا لوولە”ی ئاوی شاری سەقز، ئاوی شارەكە بڕاوە و “نان”یش دەست ناكەوێ.
بە پێی هەواڵی گەیشتوو بە *زاگرۆس پۆست* لە دوێنێ ئێوارەوە “شا لوولە”ی ئاوی ناوشاری سەقز كە لە نزیك گوندی “دەرە پەمان”دایە، لە شەوی رابردووەو شكاوە و ئێستا هیچ شوێنێكی شارەكە ئاویان نیە و بەو هۆیەوە نانەواییەكانیش كار ناكەن و خەڵكی شارەكە لە دۆخێكی شپرزەدا دەژین و نان و ئاویان دەست ناكەوێ.
جێگای وەبیرهێنانەوەیە، ئاوی خواردنی شاری سەقز زۆر پیسە و زۆرتر لە قوڕاو دەچێ تا ئاوی خواردن و تا ئێستا زۆر جار خەڵكی شارەكە لەو پەیوەندەدا نەڕەزاییان دەربڕیوە و تەنانەت بەرپرسی ماڵپەڕی “شار نیوز” بە ناوی “هیوا فولادی” كە تایبەت بە هەواڵ و زانیاری شاری سەقزە، بە هۆی بڵاو كردنەوەی ئەو هەواڵە لەگەڵ فەرمانداری شار تووشی كێشە بووە و تەنانەت چەندین جاریش لە لایەن دام و دەزگا ئەمنیەتی و نیزامیەكانی كۆماری ئیسلامیەوە، بانگهێشت و دەستگیر كراوە.
