زاگرۆس پۆست
یەكێكی دیكە لە چالاكانی مەدەنی شاری سنە كە لە خۆپیشاندانی پشتیوانی دەربڕین لە مقاومەت و خۆڕاگری شاری كۆبانێ دەستگیر كرابوو، ئازادكرا.
بە پێی ئەو هەواڵانەی بە “زاگرۆس پۆست” گەیشتووە، “سوهراب جەلالی” چالاكی مەدەنی ناسراوی خەڵكی شاری سنە، كە لە درێژەی رەوتی دەستبەسەر كردنی چالاكانی مەدەنی لە پەیوەند بە خۆپیشاندانی ناڕەزایی دەربڕین بە هێرشەكانی داعش بۆ سەر كوردستان و بەتایبەت شاری كۆبانێ لە رۆژئاوای كوردستان دەستگیر كرابوو، پاش 8 رۆژ لە دەستگیركرانی ئێوارەی ئەمڕۆ یەكشەممە 18ی مانگی خەزەڵوەر لە زیندان ئازاد كرا.
شایانی باسە، لە رەوتی خۆپیشاندانی خەڵكی شاری سنە بۆ پشتیوانی لە مقاومەت و خۆڕاگریی شاری كۆبانێ لانیكەم 17 كەس دەستگیر كران، كە هەتا ئێستاش چارەنووسی 3 كەسیان بە ناوەكانی ” خالید حسێنی، جەهانبەخش وەكێڵی و یەدێ سەمەدی” نادیارە و بنەماڵەكانیان سەبارەت بە چارەنووسی ئازیزانیان تا ئێستا چەندین كۆبوونەوەیان لە بەردەم دادگوستەریی كۆماری ئیسلامی لە شاری سنە بەڕێوە بردووە.
