زاگرۆس پۆست
لە ماوەی یەك ساڵی رابردوو زیاتر لە 70 سەر ئاژەڵ و مەڕ و ماڵاتی خەڵكی گوندەكانی شاری “دیواندەرە” لە لایەن كەسانی نەناسراو دزراوە.
بە پێی ئەو هەواڵانەی بە *زاگرۆس پۆست* گەیشتووە، ئەمڕۆ لە گوندی “مەحمودیە” سەر بە شاری دیواندەرە، 40 سەر مەڕ و ماڵاتی دوو بنەماڵە بە ناوەكانی “سەعید مورادی و كەماڵی قەیسەری” لە لایەن كەسانی نەناسراو دزراوە.
ئەمەش لە حاڵێكدایە كە لە ساڵی رابردوو تا ئێستا 50 سەر مەڕ و ماڵاتی هاوڵاتانی دانیشتووی گوندی “كەڵەكان” سەر بە شاری دیواندەرە لە لایەن كەسانی نەناسراو دزراون، كە لەو رێژە لە مەڕ و ماڵاتەكە 10 سەریان هی كەسێك بە ناوی “جەلیل عبادی” بووە.
شایانی باسە، دیاردەی دزی كردن لە ماڵان و بەتایبەت دزینی مەڕ و ماڵاتی كۆمەڵانی خەڵك و بەتایبەت خەڵكی زەحمەتكێشی گوندی سەر بە شارە جیاجیاكانی كوردستان لە ماوەی ساڵانی رابردوو بە ئاستێكی بەرچاو زیادی كردووە و تا ئێستا بە سەدان سەر لە ئاژەڵ و مەڕ و ماڵاتی خەڵك لە لایەن كەسانی نەناسراو دزراوە. هۆكاری زۆر بوونی ئەم دیاردەیە نەشیاوە لە لایەن هاوڵاتیانەوە، “هەژاری، دەسكورتی و بێ داهاتی و دابین نەبوونی ژیانێكی لەبار و مرۆیی و دەست و پەیوەندەكانی كۆماری ئیسلامی ” باس دەكرێ.
