بەرز راگرتنی یادی ساڵوەگەڕی گیانبەختكردوو *شێركۆ مەعارفی* / بە وێنە

ژمارەیەك لە چالاكان و هەڵسووڕاوانی بزاوتی شۆڕشگێڕانەی كوردستان بە بۆنەی 13ی مانگی خەزەڵوەر ساڵیادی لەسێدارەدانی هەڵسووڕاوی سیاسی كورد و ئەندامی *كۆمەڵەی زەحمەتكێشانی كوردستان* لە سەر گڵكۆی ئەو گیانبەختكردووە ئامادەبوون.

بە پێی هەواڵێ كە بە *زاگرۆس پۆست* گەیشتووە، ژمارەیەك لە چالاكان و هەڵسوڕاوانی بزاوتی شۆڕشگێڕانەی كوردستان رۆژی دووشەممە بە بۆنەی ساڵوەگەڕی گیانبەخت كردنی چالاكی سیاسی كورد و ئەندامی *كۆمەڵەی زەحمەتكێشانی كوردستان* که لە لایەن كۆماری ئیسلامی ئێرانەوە ساڵی رابردوو ئێعدامكرا، هاوڕێ لەگەڵ دایكی شەهید *شێركۆ مەعارف* لەسەر گڵكۆکەی ئامادەبوون.

یەكێك لەو هەڵسوڕاوانە بە *زاگرۆس پۆست*ی راگەیاندووە كە، لە سەر گڵكۆی شەهید شێركۆ چەند پرسیارێكم ئاراستەی دایكی ئە وشەهیده, واتە دایە روقییە” كردووە و ئەویش وەڵامی داوەتەوە. لە وەڵامی یەكێك لە پرسیارەكان سەبارەت بە بیروبڕوا و هەڵسوكەوت و پێگەی شەهید شێركۆ دایكی وەڵامی داوەتەوە كە: شێركۆ كەسێكی خۆشەویست و دڵسۆز و خەمخۆر و جێگا متمانەی هەموو هاوڕێیان و بنەماڵەكەی بوو و بڕوایەكی پتەوی بە رێبازەكەی و وەدیهێنانی ئازادی و رزگاریی كوردستان هەبوو.

هەروەها دایە روقییە ئاماژەی بەوە داوە كە، شێركۆ جێگای شانازیی كۆمەڵانی خەڵكی كوردستانە و بە شەهید بوونی بنەماڵەكەی لە هەموو دوونیا سەربەرز كرد و بێگومان هیچ كات خوێنی بەفێڕۆ ناچێ، چوونكە ئەو رێگایە هەر درێژەی دەبێت و منیش وەكوو دایكی ئەو شەهیده بەئەمەگە هەتا هەتایە سەرم بەرزە.