دوو هاوڵاتی “سەقز”ی بە هۆی تەقینەوەی مین بریندار بوون

دوو هاوڵاتی خەڵكی شاری سەقز بە هۆی تەقینەوەی مین لە سەر سنوور بریندار بوون.

بە پێی ئەو هەواڵانەی بە *زاگرۆس پۆست* گەیشتوون، بە هۆی تەقینەوەی مین لە سنووری سەیرانبەند لە نێوان شاری بانە و باشووری كوردستان، 2 هاوڵاتی كە هەردووكیان خەڵكی شاری سەقزن بە ناوەكانی عادڵ محەمەدیان و قادر نەباتی، بریندار بوون.

پاش بریندار بوونی ئەو 2 هاوڵاتیە عادڵ محەمەدیان رەوانەی نەخۆشخانەی تاران و قادر نەباتی رەوانەی نەخۆشخانەی شاری سنە كراوە.

ئەمە لەحاڵێكدایە كە ماوەیەك پێش ئێستا منداڵێكی تەمەن 6 ساڵان بە ناوی “ئاڵا روبینا”، بە هۆی تەقینەوەی مینەوە چاوی لەدەستدا.

دەوترێ بنەماڵەی ئەو كچە 6 ساڵ تەمەنە، بەدەست هەژاری و دەستكورتییەوە دەناڵێنن و توانای ئەوەیان نییە، كە نەشتەرگەری بۆ رۆڵەكەیان ئەنجام بدەن و چاوی راستی لەدەست داوەو دەماری چاوی بەهۆی بەركەوتنی پارچەی مین لەناو چووە.

شایانی باسە، ساڵانە بە دەیان هاوڵاتی كورد بە هۆی تەقینەوەی من و پاشماوەی كەرەستەی جەنگی بەجێماو لە شەری 8 ساڵەی نێوان كۆماری ئیسلامی ئێران و عێراق دەبنە قوربانی و یان بریندار دەبن یان گیانیان لەدەست دەدەن.