زاگرۆس پۆست
چەكدارانی داعش 20 ئەفسەری نێو ریزەكانی پۆلیسی عێراقی لە موسڵ لە تۆڵەی شیكەست لە ناوچەی زومار گوللە باران كردووە.
بە پێی راپۆرتی هەواڵنێریی باسنیوز: دوای ئەوەی گرووپی داعش شاری موسڵی داگیر كرد، دەستی بە هەڵمەتێكی فراوانی گرتنی پۆلیس و هێزە ئەمنییەكانی عێراق كردووە و رۆژانە بەشێك لەو كارمەندانەی هێزە ئەمنییەكان كە نەیانتوانیبوو لە شارەكە رابكەن، دەستگیر كراون و تا ئێستە زیاتر لە 600 پۆلیس دەستگیر كراون، كە لە نێویاندا ئەفسەری پلە بەرز بوونی هەیە.
دەوترێ دوێنێ یەكشەممە 4ی مانگی رەزبەر و یەك رۆژ دوای گرتنەوەی زومار لە لایەن هێزی پێشمەرگەوە، 20 كەس لەو 600 بەندكراوانەی هێزە ئەمنییەكان كە پلەی بەرزیشیان هەیە، لە تۆڵەسەندنەوەی ئەو شكستەی لە زومار و دەوروبەری تووشی بوون، گوللەباران كراون.
لە لایەكی دیكەوە هەواڵەكان لەوبارەوە باس لەوە دەكات كە، چەكدارانی داعش پا ئەو شكستە لە نێوان خۆیاندا تووشی كێشە بوون و بەو هۆیەوە تەقەیان لە یەكتر كردووە و لە ئاكامدا بە دەیان چەكدار كوژراون و بریندار بوون.
