زاگرۆس پۆست
به‌پێی ئه‌و لێدوانانه‌ی له به‌رپرسانی وه‌زاره‌تی پێشمه‌رگه‌وه دراوه به كه‌ناڵه‌كانی راگه‌یاندن، ئه‌مڕۆ 3-8-2014 ژماره‌یه‌ك چه‌كی قورس گه‌یشتووه‌ته ده‌ستی هێزه‌كانی پێشمه‌رگه، له ئێستاشدا هێزه‌كان سه‌رقاڵی خۆسازدان و خۆئاماده‌كردنن بۆ ئه‌وه‌ی هێرشێكی فراوان بكه‌نه سه‌ر شنگار و له چه‌ند قۆڵێكه‌وه كۆنترۆڵی شاره‌كه بكه‌نه‌وه.
له لایه‌کی تره‌وه فورات نیوز بڵاویكردەوە هێزێكی YPG بۆ پاراستنی شارۆچكەكەو كوردانی ئێزیدی گەیشتونەتە شنگارو لەئێستاشدا شەڕوپێكدادان لەگەڵ داعش دەستیپێكردوە. پێشتر هه‌واڵی ئه‌وه بڵاو بووه‌وه که خه‌ڵکی شنگار داوای به‌هاناوه‌چوونیان له YPG کردووه.
ده‌وترێت له ئێستادا خه‌ڵکی شنگار روبه‌ڕوی بارودۆخێكی سامناک بوونه‌ته‌وه‌‌و زیاتر له 700 ئۆتۆمبێل به سه‌رنشینه‌وه په‌ڕیونه‌ته‌وه ناو خاكی سنوری نێوده‌وڵه‌تی عیراقیان به‌ره‌و رۆژئاوا به‌جێهێشتووه.
وه‌زاره‌تی پێشمه‌رگه‌ی هه‌رێمی کوردستان به‌ڵێنی به هاوڵاتییان داوه هێزی پێشمه‌رگه رێگه به مانه‌وه‌ی داعش له خاکی کوردستان ناداو به‌م زووانه هه‌واڵی خۆش له‌و باره‌وه بڵاو ده‌بێته‌وه.
