زاگرۆس پۆست
له رۆژانی پشووی حه‌فته‌ی رابردوودا نیو ملیۆن گه‌شتیار له شاره‌کانی ئێران‌و رۆژهه‌ڵاتی کوردستان روویان له شاری بانه کردووه‌و ئه‌وه‌ش گه‌رم‌و گوڕییه‌کی زۆری به‌و شاره به‌خشی.
به گوێره‌ی زانیارییه‌کانی زاگرۆس پۆست له ناوه‌ندی شاره بانه‌وه له رۆژانی رابردوودا رێگه‌ی نێوان سه‌قز_ بانه ترافیکێکی زۆری له سه‌ر بووه‌و به شێو‌ه‌یه‌کی که‌موێنه هاوڵاتییانی ئێرانی روویان له‌و شاره کردووه بۆ کڕینی پێداویستییه‌کانی ناوماڵیان‌و هه‌روه‌ها بینینی سروشتی ئه‌و ناوچه‌یه.
به پێی زانیارییه‌کان، سه‌ره‌ڕای ئه‌و‌ه‌ی شاری بانه به فه‌رمی له ناو سنوری کۆماری ئیسلامیی ئێراندایه، به‌ڵام کڕین‌و بردنی پێداویستییه‌کانی ناوماڵ‌و به‌تایبه‌ت ئامێره ئیلێکتریکییه‌کان بۆ شاره‌کانی تر سنوورداره‌و هیچ بنه‌ماڵه‌یه‌ک ناتوانێت زیاتر له یه‌ک ئامێر له‌‌گه‌ڵ خۆی بباته‌وه.
شاری بانه له ساڵانی رابردوودا بووه‌ته پڕگه‌شتیارترین شاری رۆژهه‌ڵاتی کوردستان‌و به پێی سه‌رچاوه‌یه‌کیش هۆکاری ئه‌و سه‌رنجڕاکێشییه بۆ کراوه بوونی خه‌ڵکی شاره‌که‌و میواندارییان ده‌گه‌ڕێته‌وه.
