یادی ئه‌نفال له زانکۆی به‌هه‌شتی‌ی تاران به‌رز راگیرا

خوێندکارانی کوردی چالاکی زانکۆی به‌هه‌شتی‌ی تاران وێڕای ژماره‌یه‌ک له کوردانی دانیشتووی تاران ئه‌مڕۆ رێوڕه‌سمێکیان له هۆڵی زانکۆی بوعه‌لی بۆ رێزگرتن له ئه‌نفال به‌ڕێوه‌ برد.

به گوێره‌ی راپۆرتی خوێندکارانی چالاک، رێوره‌سمه‌که به پەیامی بەڕێوبەرانی له لایه‌ن موحەمەد عەزیزی ده‌ستی پێکردووه‌، دواتر ئەسعەد ئەردەڵان ئەنفالی لە چوارچێوەی مافی نێودەوڵەتیەوە شرۆفە کردووه‌و ئاماژەی کرد کە ئەنفال لە دەورانی عەبدولکەریم قاسمیش دا رووی داوە،لە بەشێکی دیکەی بەرنامەکە دا ویدئو کلیپێک سەبارەت بە ئەنفال‌و جینۆسایدی گەلی کورد نمایش کراوه.

دوکتور قوتبەدین سادقی کەسایەتیی هونەری کورد وتەکانی خۆی پێشکەش کردووه‌و دواتر هونه‌رمه‌ند ‘نەریمان’ بە پێشکه‌شکردنی شمشاڵ بەشداری لە مەراسێمەکەدا کردووه.

دوکتور جەلال جەلالی زاده مامۆستای زانکۆو نوێنەری پێشووی مەجلیس وتەکانی خۆی پێشکەش کردووه‌و وتیوویه‌تی: “ئێمە نەمانتوانیوە لە ئەنفال کەڵک وەربگرین بۆ بەدیهاتنی ئاواتەکانی گەلی کورد”. پاشان کورته فیلمی ‘ریشه در خاک’ له دەرهێنانی بیژەن زەمان پیرا نمایش دراوه.

به‌شێکی کۆڕه‌که‌ش ته‌رخان کراوه بۆ شیعرو تێیدا هه‌ر یه‌که له به‌ڕێزان تریفە کەریمیان‌و مریەم محەمەدی بە خوێندنەوەی شێعر به‌شدارییان کردووه. ، له کۆتایی مەراسێمەکەدا فەیسەڵ ئیبراهیم وەلی خوێندکاری هەڵەبجەیی زانکۆی بەهەشتی وتاریێکی خوێندوە.
لەم کۆڕه‌دا هه‌روه‌ها دوکتور رەحیم فەرهمەندو عەبدوڵا سوهرابی، دوکتور جگەرخوێن‌و عوسمان موزەیەن بەشدار بوون.