بەرزبوونەوەی نرخی گاز لە ئێران

دەوڵەتی ئێران بڕیاریداوە كە نرخی گاز لە ساڵی 1393 زۆرتر بكات‌و ئەمەش نیگەرانیەكی زۆری هاوڵاتیانی بەدوای خۆیدا هێناوە.

بە پێی هەواڵێكە بە ناوەندی هەواڵنێریی زاگرۆس پۆست گەیشتووە، لەسەر بڕیارێكی دەوڵەت نرخی گاز لە ئێران لە ماوەی ئەمساڵ بە رێژەی 20 لە سەد بەرز دەبێتەوە.

ئەمە لە حاڵێكدایە كە هاوڵاتیان بە شێوەی بەردەوام ناڕەزاییان بەرانبەر بەرزبوونەوەی نرخی خزمەتگوزاریە گشتیەكان دەربڕیوە‌و رایانگەیاندووە، لانیكەم بەرزبوونەوەی نرخی گاز‌و پێداویستیە گشتیەكان دەبێ بە بەراورد لەگەڵ داهاتی مانگانەدا بێت.

لە ماوەی چەند ساڵی رابردوو دەوڵەتە یەك لەدوای یەكەكان لە ئێران هەر جارەو بە شێوازێك بە بەرزكردنەوەی نرخی پێداویستیە گشتیەكان گوشار دەخەنە سەر شارۆمەندان‌و تا ئێستاش هیچ لایەنێكی پەیوەندیدار وڵامێكی شیاوی بەم شێوازە لە بەرزبوونەوەی نرخەكان نەداوەتەوە.