زاگرۆس پۆست
ئەنجوومەنی ژینگەپارێزانی “ژیانی سەوز” لە شاری سەقز، بەربەست و گوشارەکانی فەرمانداریی و شاره‌داریی بۆکان بۆسه‌ر ئەنجوومەنی ژینگەپارێزی “وڵات” لە شاری بۆکان مه‌حكووم و پشتیوانیی له‌م ئه‌نجومه‌نه ژینگه‌پارێزیه كردووه.
بە پێی هەواڵی گەیشتوو بە ماڵپەڕی هەواڵی زاگرۆس پۆست؛ ئەنجوومەنی ژینگە پارێزانی “ژیانی سەوز”ی شاری سەقز پشتیوانی خۆیان لە هەمبەر بەربەست و گوشارەکانی کاربەدەستانی ڕژیم ( فەرمانداری و شارەداری بۆکان) لە شاری بۆکان بۆ داخستن و ڕاگرتنی چالاکی ئەنجوومەنی ژینگە پارێزانی “وڵات”ی شاری بۆکان دەربڕی و له به‌شێك له دقی ئه‌م پشتیوانییه هاتووه، چارەسەری کێشە ژینگەییەکان، ئەرکێکە کە کەس و لایەن و رێکخراوەی بۆ نییە، ئەرکێکی گشتییە و هاوکاری و هاوخەمی هەموو کۆمەڵگای دەوێ و چاوپۆشی لەو کێشانە، کارەساتی گەورەتری لێ دەکوەێتەوە.سازکردنی کۆسپ و لەمپەر لەبەر دەم کار و چالاکی ژینگەیی، سەرەڕای ئەوەی لەگەڵ ئەرکی دەوڵەت یەک ناگرێتەوە، بگرە دانانی یاسا لە ئەستۆی حکوومەتە و دەبێت ئەو کەلێنەی لە کەم و کورتی چالاکی خه‌ڵك درووست بووە، پڕ بکاتەوە. پاراستنی ژینگە بابەتێکی جیهانیە و دڵەڕاوکێ و نیگەرانی لای زۆر وڵاتان ساز کردووە و هەر وڵاتێک، ساڵانە بڕێکی زۆر بۆ چاکسازی و بەرەنگاربوونەوە لەگەڵ گرفتە ژینگەییەکان تەرخان دەکەن. تگەرە خستنە سەر رێگەی ئەنجومەنی ژینگە پارێزانی شاری بۆکان و بەرگری لە چالاکوانانی دڵسۆزی بۆکان لە لایەن شاره‌داریی و فەرمانداریی ئەو شارەوە، دوور لە هەر یاسا و رێسا و نەریتێکی کۆمەڵگایە، بەم بۆنەوە ئێمە وەکوو ئەنجومەنی ژینگە پارێزانی “ژیانی سەوز”ی سەقز ئەم کارە مه‌حكووم دەکەین و داوا لەو دوو رێکخراوە حکوومەتییە دەکەین کە بەرگری لەم ئەنجوومەنە دڵسۆزەی ژینگە نەکەن،ئەگەر هاوکار نین، بەربەستیش نەبن.
