زاگرۆس پۆست
رێكخراوی نەتەوەیەكگرتووەكان رۆژی چوارشەممە بە دەركردنی راگەیاندنێك داوای لە كۆماری ئیسلامی ئێران كرد كە رەوتی ئێعدامەكان لە ئێران رابگرێت‌و بەمشێوە نیگەرانی خۆی لە بەرزبوونەوەی رێژەی لە سێدارەكان لەو وڵاتە دەربڕیوە.
دەفتەری مافی مرۆڤی رێكخراوی نەتەوەیەكگرتووەكان دەڵێت، راپۆرتەكان باس لەوەدەكەن، لانیكەم 40 كەس لە ماوەی یەكمانگی رابردوو لە ئێران ئێعدامكراون. ئەم دەفتەرە هاوكات ئاماژەی بەوەدا، كۆی 625 لە ماوەی ساڵی 2013 لە ئێران ئێعدامكراون كە بەشێك لەوانە بەندكراوی سیاسی‌و بەشێكی دیكەشیان تاوانی قاچاخی مادەسڕكەرەكانیان لەسەر بووە.
ئەمە لە كاتێكدایە كە تا ئێستا كۆماری ئیسلامی هیچ دژكردەوەیەكی لە بابەت راگەیاندنەكەی رێكخراوی نەتەوەیەكگرتووەكان نیشان نەداوە‌و هاوكات جەواد لاریجانی سەرۆكی دەزگای قەزایی هاوڕێ لەگەڵ براكەی جەواد لاریجانی سەرۆكی ستادی مافی مرۆڤ چەندین جار پشتگیریان لە رەوتی ئێعدامەكان لە ئێران كردووە.
لە ماوەی یەكمانگی رابردوو رێكخراوی لێبوردنی نێونەتەوەیی‌و چاودێری مافی مرۆڤ خوازیاری راگرتنی ئێعدامەكان لە ئێران بوون.
