لە كوژرانی كۆڵبەرێكی دیكە تا فرۆشتنەوەی دووبارەی كەلوپەلی كاسبكاران

ئێوارەی رۆژی شەممە رێكەوتی 28ی مانگی خەرمانانی 1394ی هەتاویی هێزە نیزامییەكانی كۆماری ئیسلامیەوە هاووڵاتییەكی كورد لە ناوچەی سنووری باشماخ سەر بە شاری مەریوان، دەدەنە بەر دەستڕێژو گوللە و دەیكوژن.

سەرچاوەكانی هەواڵ ناوی ئەو كۆڵبەرەیان “ئیسماعیل” كوری عەلی تەمەن 20 ساڵ وخەڵكی گوندی “ئەسكۆڵ” راگەیاندووە و دەوترێ، ئیسماعیل شوان بووەو بە تاوانی بەزاندنی ” هێڵی قەدەغە كراو” لەلایەن هێزەكانی كۆماری ئیسلامیەوە تەقەی لێكراوە.

هەروەها لە هەواڵێكی دیكەدا هاتووە، كە سپای پاسداران لە شاری مەهاباد كەلوپەلی كاسبكاران كە زەوت دەكرێ، لە نێو شارەكانی كوردستان دەیفرۆشنەوە.

دەوترێ، “دلاوەر ڕەنجبەرزادە” فەرماندەی سپای پاسداران لە مەهاباد بە هاوكاریی دەست‌و پێوەندییەكانی، باری تاناكۆڕاو مەشرووب‌و ئەو كاڵایانە لە لایەن ناوندەی نیزامی‌و ئەمنیەتییەكانی ئەو شارەوە لە كاسبكاران دەگیرێن، بە هاوكاریی بەرپرسانی سپای پاسداران مەهاباد و سەردەشت و  بە شێوەی نهێنی دەبرێنەوە سەردەشت‌و دەیانفرۆشنەوە.

جێگای باسە، ژمارەیەكی زۆر لە هاووڵاتییانی كورد بە هۆی بێكاریی و تەنها بە مەبەستی بژیوی ژیانی خۆیان روو دەكەنە كاری پڕمەترسیی كاسبی لە سەر سنوورەكان و بەم بۆنەوە رۆژانە و بە شێوەی بەردەوام لە لایەن هێزەكانی كۆماری ئیسلامیەوە هێرش دەكرێتە سەریان و بەرەوڕووی خەساری گیانی و ماڵیی دەبنەوە.