هاوڵاتییەكی خەڵكی شاری كامیاران بە شێوەیەكی گوماناوی گیانیلەدەستدا

هاوڵاتییەكی خەڵكی یەكێك لە ئاواییەكانی سەر بە شاری كامیاران بە شێوەیەكی گوماناویی و لە رێگای رووداوی بەرق گرتووییەوە گیانی لەدەستداوە.

بە پێی هەواڵی گەیشتوو بە “زاگرۆس پۆست”، كاتژمێر 3ی بەرەبەیانی ئەمڕۆ چوارەشەممە 26ی مانگی خاكەلێوە لە ئاوایی ئاسنگەران سەر بە شاری كامیاران هاوڵاتییەك بە ناوی “شەهرام غوڵامی” كوڕی عەلی ئەكبەر و تەمەن 32 ساڵ لە رێگای بەرق گرتوویی گیانی لەدەستداوە.

یەكێك لە خەڵكی ناوچەكە بە زاگرۆس پۆستی راگەیاند، كە ئەو هاوڵاتییە كوردە پێشتر پڕۆسەی هاوسەرگیری پێكهێناوە و جیا بوونەتەوە و ئێستاكەش منداڵێكی 6_7 ساڵەیان هەیە.

دەوترێ، ئەم بەیانیە خەڵكی ئاواییەكە ئاگادار كراونەتەوە، كە ئەو هاوڵاتییە بەهۆی بەرق گرتوویی گیانی لەدەستداوە، بەڵام باس لەوە دەكرێ كە مەرگی ناوبراو گوماناویی بووە و هۆی ئەوەیكە كاتژێر 3ی بەرەبەیان بۆچی تووشی ئەو رووداوە بووە، تا ئێستا روون نەبووەتەوە.