زاگرۆس پۆست
تانكەرەكێكی دیكەی سووتەمەنی (نەوت) لەسەر جادەی سنە بەرەو سەوڵاوا وەرگەڕەایەوە و بارەكەی رژاوەتە سەر جادەكە و ئەو دەوروبەری پیس كردووە.
بەرپرسی رێگاوبانی گەشتیی رێگا و شارسازیی پارێزگای سنە، ویڕای پشتڕاست كردنەوەی ئەم هەواڵە، وتوویەتی: شەوی شەممە 15ی مانگی خاكەلێوە تانكەرەكی هەڵگری سووتەمەنی (نەوت) لەسەر جادەی سنە_سەوڵاوا وەرگەڕاوە و پێش ئەوەیكە ئەو تانكەرە تووشی ئاگرتێبەردان و تەقینەوە یان هەر رووداوێكی دیكە ببێت، لە لایەن پۆلیسەوە رێگاكان لە هەردوولاوە داخراوە و لایەنە پەیوەنیدارەكان بارەكەیان بەتاڵ و تانكەرەكەیان لەو شوێنە دوور خراوەتەوە.
بە پێی راپۆرتی سەرچاوە هەواڵنێرییە حكومەتییەكانی ئێران، لە ماوەی 6 ساڵی رابردوو زیاتر لە 120 تانكەر سووتەمەنی و مەوادی شیمیایی لە سەر جادەكانی پارێزگای سنە وەرگەڕاوەتەوە و چەند جارێكیش باری ئەو تانكەرانەش رژاوەتە نێو ئاوی سەدی قشلاخی سنە و سەدی شەهید كازمی سەقز و چەند رووبارێكی دیكە و ئەمەش بە ئاستێكی زۆر ژینگە و تەندروستی هاوڵاتییان دەخاتە مەترسیەوە.
بە پێی ئامارەكان، رۆژانە نزیەی 400 تا 800 تانكەر لە نێوان جادەكانی رۆژهەڵاتی كوردستان و باشووری كوردستان هاتوچۆ دەكەن و ئەمەش هەم قەرەباڵغیەكی زۆری خستووەتە نێو جادەكان و جادەكانیشی خراپ كردووە، وەكوو مەترسیەكی گەورە بۆ سەر ژینگە و سرووشتی كوردستان دێتە ئەژمار و كاربەدستانی كۆماری ئیسلامی و لایەنە پەیوەندیدارەكان بۆ دوورخستنەوەی ئەم مەترسیە و چارەسەركردنی كێشە پەیوەندیدارەكان، هەوڵێكی جیددییان تا ئێستا نەخستووەتە گەڕ و ئەمەش نیگەرانی چالاكان و ناوەندەكانی ژینگەپارێزیی نیگەران كردووە.
