ناڕەزایی و تێكهەڵچوونی خەڵكی “كرماشان” لەگەڵ هێزەكانی كۆماری ئیسلامی

لە ئاكامی رەوتی كۆكردنەوەی كەرەستەكانی پەیوەندیدار بە ماهوارە و ئەمجار لە شاری “كرماشان” ئاڵۆزیی لە نێوان خەڵك و هێزەكانی كۆماری ئیسلامی هاتە ئاراوە.
بە پێی هەواڵێكە بە “زاگرۆس پۆست” گەیشتووە، رێكەوتی پێنجشەممە 11ی مانگی بەفرانبار هێزە چەكدارەكانی كۆماری ئیسلامی بە مەبەستی كۆكردنەوەی ماهوارە لە گەڕەكەكانی “مستەوفی و مەیدانی ئازادی” شاری كرماشان بە كەڵك وەرگرتن لە جەرسقیل هەڵیان كوتاوەتە سەر ماڵی هاوڵاتیان و ئەم كردەوەیەش ناڕەزایی هاوڵاتیانی لێ كەوتووەتەوە.
هەواڵەكە باس لەوەش دەكات، كە چەكدارەكانی كۆماری ئیسلامی پاش ئەوەیكە لە رێگای جەرسەقیلەوە رۆیشتوونەتە سەربان و نێو ماڵی هاوڵاتیانی شاری كرماشان و دەستیان كردووەتە كۆكردنەوەی دیش و رێسیوێری ماهوارەی ماڵی هاوڵاتیان، بەرەوڕووی شەپۆلێك لە ناڕەزایی بوونەتەوە و لە ئاكامیشدا هاوڵاتیان بە فڕێ دانی بەرد و كەرەستەی لەو چەشنە، دەستیان كردووە بە راودوونان و راماڵدانی ئەو هێزانە.
شایانی باسە، ساڵانە و لە شەپۆلێكی گەڵاڵە كراودا بۆ مایەك ماڵی هاوڵاتیان لە شارە جیاجیاكانی ئێران و بەتایبەت لە رۆژهەڵاتی كوردستان، هێزە ئینتزامی و نیزامیەكانی كۆماری ئیسلامی وێڕای سازدانی كەشی ترس و دڵەراوكێ هەوڵی كۆكردنەوەی ئامرازەكانی پەیوەندیدار بە ماهوارەی هاوڵاتیان دەدەن و زۆر جارایش ئەو كردەوەیە لە لایەن خەڵكەوە بەرپەرچ دەدرێت و ناڕەزایی لێ دەكەوێتەوە.