زاگرۆس پۆست
گوشارەكانی ئیدارەی ئیتلاعاتی كۆماری ئیسلامی بۆ سەر چالاكانی سیاسی كورد لە ناوچەكانی “ئیلام و كرماشان” پەرە دەستێنێت و ئەو گوشارانە تەنانەت ژن و كچی ئەو بنەماڵانەشی لەخۆ گرتووە.
بە پێی هەواڵی گەیشتوو بە “زاگرۆس پۆست”، هێزە ئیتلاعاتیەكانی سەر بە كۆماری ئیسلامی لە ناوچەی “ئیلام و كرماشان” بە بێ وەرگرتنی مۆڵەتی یاسایی، هێرش دەكەنە سەر ماڵی چالاكانی سیاسی، پێشمەرگە و گریلا لەو دوو پارێزگا كورنشینە و بێ رێزیی و سووكایەتیان پێ دەكەن و پاشان رەقەمی تەلەفۆنی ئەندامانی ئەو بنەماڵانە وەردەگرن و دواتر یەكە بە یەكەی ئەندامانی ئەو بنەماڵەگەلە بە شێوەی جیاجیا بانگهێشتی ئیدارەی ئیتلاعات و ستادی خەبەری دەكرێن.
ئەو بانگهێشتانە تەنانەت ژنان و كچانی بنەماڵەكانیش لە خۆ دەگرێت و لە ئیدارەی ئیتلاعات بەرەوڕووی بێ رێزیی دەبنەوە.
دەوترێ، هێزە ئیتلاعاتیەكانی كۆماری ئیسلامی، لە زۆربەی شارەكانی سەر بە دوو پارێزگای “ئیلام و كرماشان” چەندین وەها كردەوەگەلێكیان ئەنجامداوە و بنەماڵەی چالاكان و خەباتكارانی كوردیان كردووەتە ئامانجی بێ رێزییەكانی خۆیان.
شایانی باسە، ئێستاكە بە هەزاران چالاك و خەباتكاری كورد لە ریزەكانی پێشمەرگە و گریلا لە دەرەوەی سنوورەكانی رۆژهەڵاتی كوردستان چالاكی دەكەن، كە بەردەوام بنەماڵە و كەس و كاریان لە لایەن كۆماری ئیسلامیەوە دەكەونە بەر بێ رێزیی و زەخت و گوشارەوە بۆ ئەوەی رۆڵەكانیان ریزەكانی خەبات بەجێ بهێڵن.
