زاگرۆس پۆست
زەینەب جەلالیان خەڵکی ماکۆ، سەکینە پەروانە خەڵکی خوراسان و سۆھەیلا حجاب خەڵکی سەرپێڵ زەھاو لە بەندی ژنانی قەرچەک وەرامین مانیان لە خواردن گرت.
دەوترێ هێزە ئەمنییەکانی رژیم رۆژی شەممە ٣١ی جۆزەردان هەڵیانکوتاوەتە سەر بەندی قەرەنتینە و بە بیانووی پشکنینی زەینەب جەلالیان و سوهەیلا حیجاب ویستوویانە کە سووکایەتییان پێبکەن کە لەگەڵ کاردانەوەی ئەو دوو بەندکراوە بەرەوڕوو بوونەتەوە.
زەینەب جەلالیان حوکمی زیندانی هەتاهەتایی بە سەردا سەپاوە و ماوەی دوو مانگە لە بەندی قەرەنتینەی بەندیخانەی قەرچەکی وەرامین ڕاگیراوە و خوازیاری گەڕاندنەوەیەتی بۆ بەندیخانەی شاری خۆی لە پارێزگای ئورمیە.
هەروەھا سەکینە پەروانە زیندانی سیاسی کورد کە حوکمی پێنج ساڵ بەندکرانی بەسەردا سەپاوە و ئێستا لە بەندی ٣ی بەندیخانەی قەرچەک، کە بەندی تایبەت بە تاوانە مەترسیدارەکانە، راگیراوە.
ناوبراو کە خەڵکی پارێزگای خوراسانی ڕەزەوییە، چەند ڕۆژ پیش لەلایەن زیندانیانی ئەو بەندەوە درابووە بەر لێدان و سووکایەتی.
ھەروەھا سۆھەیا حجاب پارێزەر و چالاکی مەدەنی خەڵکی کرماشان لە ڕۆژی سێشممە ٢٧ی جۆزەردان، لە بەندی قەرەنتینەی بەندیخانەی قەرچەک وەرامین بە نیشانەی ناڕەزایەتی دەربڕین بە دۆخی نالەباری شوێنی ڕاگیرانی و گوشاری ناوەندە ئەمنییەکان بۆ سەر بنەماڵەکەی مانی لە خواردن گرتووە.
