زاگرۆس پۆست
بەرەبەیانی ئەمڕۆ یەکشەممە ١٤ی مانگی گوڵان، ھێزە چەکدارەکانی رژیم لە ناوچەی بانە کۆڵبەرێکی ٢٢ ساڵ تەمەن بە ناوی “مەحموود مورادی” کە ٣ ھەفتە پێش ژیانی ھاوبەشی پێکھێنابوو، دەیگرن و وێڕای لێدان و ئەشکەنجە کردن، دەیدەنە بەر داستڕێژی گوللە و دەیکوژن.
ھەروەھا ھێزەکانی رژیم کاتژمێر ٢١ی شەوی رابردوو لە ناوچەی نۆکان_کانی زەرد لە شاری سەردەشت تەقە لە کۆڵبەرێک دەکەن و دەستبەجێ دەیکوژن. کۆڵبەرە کوژراوەکە ناوی “محەمەد ئیبراھیم زادە” و خەڵکی ئاوۆیی “نەبی ئاوا” سەر بە شاری “میراوا” بووە و ژن و ٣ منداڵیشی ھەبووە.
لە ماوەی رۆژانی رابردوودا ھێزەکانی سپای پاسداران لە نزیک ئاواییەکی سەر سنووری چاڵدران بە ناوی “وەکیل” تەقە لە کۆڵبەرێک بە ناوی “سدیق ئەحمەدی” دەکەن و بە توندی برینداری دەکەن.
ئەم کۆڵبەرە بە گومانی ھەڵگرتنی باری قاچاخ و لە مەودایەکی نزیک و بێ ئاگادارکردنەوە تەقەی لێ کراوە.
