زاگرۆس پۆست
لە درێژەی دەستگیر کردنی لاوانی کورد بە تاوانی بەشداری لە خۆپێشاندانەکانی مانگی خەزەڵوەر، دەزگای ئیتلاعاتی کۆماری ئیسلامی و ئیتلاعاتی سپا لە شارەکانی جوانڕۆ و مەریوان ٨ لاوی دیکەیان دەستگیر و راپیچی گرتووخانە کرد.
لە ماوەی رۆژانی رابردوودا سۆران ڕاوەند کوڕی مەحمود و خەڵکی شاری مەریوان لە ماڵی خۆیان و بە تۆمەتی بەشداری لە خۆپیشاندانەکان دەستگیر و بۆ شوێنێکی نادیار ڕاگوێزراوە.
لە لایەکی دێکەوە هاووڵاتیەکی دیکەی کورد بە ناوی باقی فەتاحی خەڵکی بانە لە مەریوان دەستگیر کراوە و تا ئێستا هیچ زانیاریەک لەر چاڕەنووسی و شوێنی ڕاگیرانی نییە.
هەر لە درێژەی هەڵمەتی ڕەشبگیری لاوانی کورد لە ڕۆژهەڵات هێزە ئیتلاعاتیەکانی کۆماری ئیسلامی لە جوانڕۆ ٦ کەسیان بە ناوەکانی مەسعود تاهیری، ئاروین ڕەزایی نەژاد، ئارام سەعیدیان، ئارمان سەعیدیان، کەماڵ زاهیری و یاسر هیدایەتی دەستبەسەر کردووە.
چارەنووسی ئەو شەش هاووڵاتیە جوانڕۆییە ڕوون نییە و ئیتلاعاتی کۆماری ئیسلامی هیچ وڵامێکی بە بنەماڵەکانیان نەداوەتەوە.
