زاگرۆس پۆست
هاوسەری گیانبەختکردوو “شەریف باجوەر”، لە ڕێوڕەسمی ساڵوەگەڕی گیانبەختکردووانی ژینگەی کوردستان، پەیامێکی پێشکەش بە هاوڵاتیانی کوردستان کرد.
زاگرۆس پۆست: ڕۆژی یەکشەممە، ٣ی خەرمانان، لە ڕێوڕەسمێکی پڕشکۆدا، خەڵکی مەریوان و کوردستان، لەسەر گڵکۆی کاک “شەریف باجوەر” و کاک “ئومید کۆنەپۆشی” ئامادە بوون و یادی گیانبەختکردووانی ژینگەیان بەرز ڕاگرت.هەروەها لەم ڕێوەڕسمەدا، سەرجەم ئەنجومەنەکانی ڕۆژهەڵاتی کوردستان، بەتایبەت ژینگەپارێزان، ئەنجومەنەکانی ئەدەبی و هونەری بەشدار بوون و پەیامی هاوبەشی ڕێکخراوەکان خوێندرایەوە و سوێندی وەفا بە ڕێبازی گیانبەختکردووان دووپات کرایەوە و هەروەها هاوسەری گیانبەختکردوو کاک “شەریف باجوەر” پەیامێکی پێشکەش بە بەشدار بووان و خەڵکی کوردستان کرد.
دەقی پەیامەکە:
خەڵکی نیشتیمانپەروەر و ژینگەپارێزی کوردستان
هاوشارییە دڵسۆز و بەئەمەگەکانمان
لەگەڵ ئێوەی بەڕێز لەسەر گڵکۆی شەهیدان، “شەریف باجوەر” و کاک “ئومێد”دا ، کۆبووینەتەوە تا ڕێز لە یاد و بیرەوەری و هزر و ئایدیا کەسکەکانیان بگرین و تاسەی دیداریان بشکێنین .
“شەریف” بۆ من، هاوسەرێکی خەمخۆر و دڵسۆز و خەمڕەوێن بوو. بەڵام ئێستا ئیتر ئەو تێکەڵ بە دار و دەوەن و بنچک و گژوگیای زاگرۆس بووە و ئەو لە ” تاکەکەسەوە ” بووەتە ئیدە و هێمای پارێزگاری لە ژینگەی کوردستان. هەر بۆیەشە، ئێوەی بەڕێز وەک من لێرە ئامادەن و بە ئامادەبوونتان، دڵی ئێمەتان خۆش و ڕۆحی شەهیدی نیشتمانیشتان، شاد کردووە
“شەریف” کورد بوو و هەر لەم مەریوانەی خۆمانەوە شەیدای زرێبار و مراوییەکانی بوو و هەر لێرەشەوە، پەیمانی هاوڕێیەتی لەگەڵ میراجی و سوورێن و قەلەبەرد و زەڕەوەدا بەست. هەر لێرەشەوە بوو کە بووە ئەڤینداری بست بە بست و پێدەشت بە پێدەشت و تاڤگە بە تاڤگە و ڕەوەز بە ڕەوەزی زاگرۆس و لە گیانیدا ئەڤینێکی کەسک کەسک چرۆی دەرکرد.
ئەو لە خۆشەویستیی کوردەوە، فێر بوو هەموو مرۆڤی خۆش بوێت و لە خۆشەویستیی کوردستانەوە فێر بوو، هەموو زەوی بە لانکە و دایکی خۆی بزانێت. هەر لەو پێناوەشدا بوو بیرۆکەی “پێنج شەممەی مێهرەبانی” لە زەینیدا شکڵی گرت و وەک ئامانج و هیوایەک بۆ داهاتوویەکی مرۆڤدۆستانە گرنگییەکی زۆری پێدا و یەکەم هەنگاوەکانی بۆ پەرەپێدان و گشتگیرکردنی ئەو بیرۆکەیە هەڵگرت. ئەو لە قووڵایی ناخیدا، مرۆڤێکی بە مانای تەواوی وشە بوو، هەر بۆیە لە کار و کردەوە و پەیڤیدا، مرۆڤایەتیی دەکەوتە شەپۆلان .
“شەریف”، هاوکات لەگەڵ ئەوەی کە مرۆڤێکی دڵناسک و نەرم و نیان بوو، فێری کردین کە لە بەرامبەر نەهامەتی و وەیشوومە و زریاندا، ئاویەر و بێستوونێ بین لە بەرخۆدان و بەچۆکدانەهاتن.
ئەو قوتابخانەی کاری دڵسۆزانەی بێ چاوەڕوانیی پاداش بوو. فێری کردین ژینگەی نیشتمان، دایکە و دەبێ ڕێزی بگرین. ئەو پێی وابوو، کاولکردنی ژینگە، کاولکردنی مرۆڤە و بۆ پارێزگاری لە مرۆڤ، دەبێ گشت چین و توێژەکانی کۆمەڵگە بەکاری هەرەوەز و ئەڤینێکی داگیرساوەوە، ژینگەکەیان بپارێزن.
لە کۆتاییدا، پەیمانی وەفاداری بە ڕێبازیان، لەسەر گڵکۆی ئەم دوو شەهیدە سەربەرزانەمان، دووپات دەکەینەوە و ڕێگەی کەسکیان تا بەدیهاتنی ئایدیا و هزرە درەوشاوەکانیان، دەپێوین. چۆن لە ماوەی یەکساڵی ڕابردوودا و سەرباری ئەو تەنگەژە و گرفتانەی بۆم دروستکران، ڕێگاکەی شەریفم بەرنەدا، بەڵێن دەدەم لەمەودوا بە گوڕ و تینێکی زیاترەوە ئەو ڕێگایە بەردەوام بکەم و بەڵێنیش دەدەم تاکوو بە هاوکاریی ئێوەی ئازیز بیرۆکەی “پێنجشەممەی مێهرەبانی”یش پەرە پێبدەم و بیگەینمە لووتکە.
ڕێگەی گەیشتن بە ئامانجە بەرزەکانیان، پڕ ڕێبوار بێت.
سپاس بۆ ئامادەبوونتان
سپاس بۆ خەمخۆریتان
سپاس بۆ هێژاییتان
