زاگرۆس پۆست
لە سوچێکی شاخی هەزار بە هەزاری قەندیل ، پێشمەرگە و گریلا خانوو و ماڵی سەربەرزیان دروست کردووە . ماڵێک کە ، نرخی مێژوویی سەر لە ئاسمان دەکوتێ .
لە باتی دیواری حیزبی ، قەڵای سەربەستی دروست کراوە . قەڵا کە ئەوەندە بەرزە مەگەر بە پەیژەی خەیاڵ بۆی بچیی و سەرکەوێ. ڕەوتی ڕووداوەکان دەڵێن : ڕۆژانی بەد بەختی و ناهەمواریی بەرەو تەواو بوون ملیان دەشکێنن . قەندیل وەک ئەرکێکی نە پساوە ، پاسەوانی هەمیشەیی بەرەنگاری و ژیانی سەربەرزانەیە . خەباتکاران شەویان کرد بە ڕۆژ ،تاکوو تیشکی خۆر لە ئاسۆی ئەو سەر نادیاری باخەکان چاو لێ کەن . هەزاران ڕاز و نهێنی جوان و ناسک ، لە سنگی ماڵەکانی قەندیل شاراوەیە . هەر بەرد و دارێک سەرگوزشتی لەرز هێنەر و نائومێدی داگیر کار باس دەکات . ماڵەکان بەرگەی گڤەگڤی با و بۆران ، بەفری قورس ،بارانی لێزمە ، تانە و لۆمەی دوژمن و شەپۆلی ترسناکی فاشیزم دەگرن . جوانچاکانی کچ و کوڕ وەک ” شا تەوار” پارێزگاری لە دیموکراسی ، مافی مرۆڤ و ئازادی دەکەن . دوژمنی داگیرکار هەرچی دەیکا ، با بیکا ! دراوسێ ماڵەکانی سەربەستی چنوور، سوورە هەڕاڵە، دار قەزوان ،ئاسک و مامزی چاومەست ، ڕووبار ،بەرزەلنگ ، ڕێواس ، وەرکەمەر ، هەڵۆی سەر شاخان ، دار بەڕوو، تریفەی مانگ، کۆتر، وەنەوشە ، کڵێڵە بەفر ، تاڤگە و سۆلاڤ وهەڵاڵە برمەی شۆخی گونا ئاڵە و ، هەموویان بە تێکڕا فوو لە شمشاڵی دڵەکانی شەیدای ئازادی دەکەن . مانگ و خۆر ، بە پێ یاسای سروشت ، هەر هەڵدێن و ئاوا دەبن و، ئەم گشت وسوڕانەوە هەر دوایی نایەت . شەوانە قەندیل کش و مات لە پرخەی خەودایە و نیگابانەکان ئازا و بوێر ،ناو بە ناو،بە بێ تەل قسە دەکەن و ئاگایان لە ئەفسانەی ژیان و وڵاتی شەڕ لێدراو و بەر کارەسات کەوتوە . بە ئێرادەیەکی مەحکەم ، مەحکەم تر لە چیا ، لە دۆڵ وشێو و رکە و بەردەڵاندا بۆ دەستکەوتەکانی مرۆڤایەتی خەبات و بەرەنگاری دەکەن . پێشمەرگە و گریلا بە گیان و دڵ بە پیر مەرگەوە دەچن . هیچ ئازارێک لەوە قورس تر نیە ، کە بیگانەکان گەلی کوردیان لە وڵاتی خۆی ئاوارە و دەربەدەر کردووە و ،تۆزقاڵێکیش لە نامەردی و لە دڵبەردی هەرگیز خۆیان نە بواردووە . من لە کانگای دڵمەوە ئەی هێزی پێشمەرگە و گریلا ، کە هەموو سەربەرزیەکانی کوردستانتان خولقاندووە ،سپاستان دەکەم .
ئەم وێنەیە، ماڵی پێشمەرگە ، لە دڵی شاخێک پیشان دەدات .
* شا تەوار: هەڵۆی سەر شاخان
هەژدەی یونی ٢٠١٧
