زاگرۆس پۆست
كۆمیتەی دیپلۆماسی كۆما جڤاكێن كوردستان (كەجەكە) رایدەگەیەنێت “ده‌بێ شه‌نگال له لایه‌ن شه‌نگالیه‌كانه‌وه به‌ریوه‌ببرێت و له لایه‌ن هێزه‌كانی خودی شه‌نگاله‌وه بپارێزرێت”.
بەپێی به‌یاننامه‌یه‌ك كه ئاژانسی فورات نیوز بڵاویكردووه‌ته‌وه، كۆمیته‌ی دیبلوماسی كه‌جه‌كه هه‌روه‌ها جه‌ختده‌كاته‌وه، هه‌ركاتێك ئێزدییه‌كان بوونه خاون هێزی خۆپاراستن و به‌ڕێوه‌به‌ری خۆسه‌ری خۆیان ئه‌وكات ئامانجی گه‌ریلا له شه‌نگال كۆتایی دێت، به‌ڵام تائێستا كشانه‌وه‌ی گه‌ریلا له ئارادا نییه‌و په‌كه‌كه‌و فه‌رمانده‌كانی گه‌ریلا هیچ لێدوانێكیان نه‌داوه له‌و باره‌یه‌وه.
كه‌جه‌كه ئاماژه‌ی به‌وه‌شكردووه، هه‌ركاتێك ئێزدیه‌كان به بیرورای سیاسی و گروپه جیاوازه‌كانیان له شه‌نگال كۆبونه‌وه و هێزێكی هاوبه‌شیان بۆ پاراستنیان دروستكرد و خۆیان به‌ڕێوه‌برد، “له‌و باوه‌ڕه‌داین كه ئه‌و كات كێشه‌ی بوونی گه‌ریلا و پێشمه‌رگه‌كانی له‌وێ چاره‌سه‌ر ده‌بێت. له‌و باره‌وه گفتوگۆكانمان له‌گه‌ڵ وه‌فدی سیاسی پارتی به‌رده‌وامه”.
“گه‌ریلا بۆ ده‌ستبه‌سه‌رداگرتن نه‌چووه‌ته شه‌نگال به‌ڵكو بو رێگریكردن له كۆمه‌ڵكوژی ئیزیدیه‌كان له لایه‌ن داعشه‌وه چووه‌ته ئه‌و ناوچه‌یه و شه‌ڕی داعشی كرد و كۆمه‌ڵگه‌ی ئێزیدی له به‌رامبه‌ر هێرشه‌كانی تیرۆریستان پاراستووه، بۆ ئه‌وه‌ی جارێكی تر روبه‌روی هێرشی له‌و شێوه‌یه نه‌بن هاوكاری ئیزیدیه‌كانی كردووه بۆ دروستكردنی ده‌زگاكانی خۆبه‌ڕێوه‌به‌ری و خۆپاراستنیان له لایه‌ن خودی شه‌نگالییه‌كانه‌وه”، به‌پێی به‌یاننامه‌كه‌ی كه‌جه‌كه.
ئەمەش لەكاتێدایە هەفتەی رابردوو موراد قەرەیلان، ئەندامی کۆنسەی بەڕێوەبەریی کەجەکە رایگەیاند، کە بۆ کشاندنەوەی چەکدارەکانیان، لە قۆناغی دانوستاندنن لەگەڵ حکوومەتی هەرێمی کوردستان.
ئەو هێزەی سەر بە پەکەکە وەک بەشێک لە میلیشیاکانی حەشدی شەعبی لەلایەن حکوومەتی عێراقییەوە مامەڵەی لەگەڵ دەکرێت و بەغدا مانگانە مووچە بە چەکدارەکانی دەدات، کە ئەم بابەتە بووەتە هۆی قووڵبوونەوەی ناکۆکییەکانی نێوان تورکیا و عێراق.
لە سەردانێکیدا بۆ عێراق و هەرێمی کوردستان، کە لە دوو رۆژی رابردوو ئەنجامی دا، بیناڵی یڵدرم، سەرۆک وەزیرانی تورکیا رایگەیاند، حکوومەتی عێراق بەڵێنی داوە کار بکات بۆ دەرکردنی ئەو چەکدارانەی سەر بە پەکەکە لە شنگال و دوای گەڕانەوەشی بۆ ئەنقەرە لە شەوی یەکشەممە 8/1/2017، یڵدرم هەڕەشەی لە عێراق کرد، کە ئەگەر ئەو چەکدارانەی سەر بە پەکەکە دەرنەکات، ئەوا تورکیا ”هەنگاوی پێویست“ لە دژی عێراق دەگرێتەبەر.
