زاگرۆس پۆست
بەشی یەكەمی قسەكانی هاوڕێ “ئیبراهیمی عەلیزادە” وێنەیەكی نوێ، وێنەیەكی هەنووكەیی و وێنەیەكی تەواو جیاواز لە كۆمەڵە نیشان دا، وێنەیەك كە پەرتەوازبوون، پاسیڤبوون و تا رادەیەكیش ئاشبەتاڵی تیادەبیندرێ، كاتێك كە چەمكی پارتی شۆڕشگێڕ بە چاوەڕوانبوون بۆ “كەوتنە لێژی گڵۆڵەی كۆماری ئیسلامی” كورت دەكاتەوە و ئینتزار بۆ هاتنەدی ئەو دەرەفەتە مێژووییە بە ئەركی حزب ناوزەد ئەكا.
لێرەدا قسە لەسەر بەكارهێنان و گواستنەوەی دەرەفەتە مێژووییەكان نیە، وەك ئەوەی كە بۆ باشوور و رۆژئاوا دروستبوون، قسە لەسەر تەحتیلبوون و پشوودانی حزب تا كاتی هاتنەئارای ئەو دەرەفەتانەیە، قسە لەسەر ونبوونی چەمكی ئیرادە بۆ بەرهەمهێنانی زەمیینەكانی دەرفەتە، قسە لەسەر ونبوونی چەمكی رادیكاڵیزم و شۆڕشگێڕی بۆ شكاندنی بەربەستەكانی سەرێگا و قسە لەسەر دانیشتن بە جێگەی رێگەبڕین بۆ دۆزینەوەی رێگە تازەكانە. لە چوارچێوەی ئەم پەسیڤبوون و موعلەقبوونەدا “چاوەڕوانی” هەوێنی هەموو چالاكییەكان پێكدێنێ و لە هەناوی ئەم تێرمەدا هەموو بژاردەكان لە دەرەوەی ئیرادەی حزبدان و هەموو گوزینەکان بە بێ دەستێوەردانی راستەوخۆ و ناراستەوخۆی حزب لەدایك دەبن، واتە دترمنیسمێكی مێژوویی بۆ تكامولی پرۆسەی هەڵوەشانی هەیمەنە و دەسەڵاتی ئیستبدادی، ئەگەرەكانی دەستێوەردانێكی دەستی دەرەكی وە یان بەگژداچوونەوەی باڵە و جناحە جیاجیا و ناكۆكەكانی سیستەم لەبەرچاودەگیردرێ و هەموو هێلكەكان دەخرێتە سەوەتەی ئەو پێشهات و ئەگەرە چاوەڕواننكراو یان چاوەڕواننەكراوانەدا. لێرەدا پرسیار ئەوەیە كە ئەی ئەگەر گڵۆڵەی كۆماری ئیسلامی هیچ كات نەكەوتە لێژی؟
لە سەرجەمی ئەو باسەدا خەباتی جەماوەری و خەباتی مەدەنی وەك ئەركی حزب تا ساتەوەختی كەوتنە لێژی گڵۆڵەكە دەستنیشان دەكرێ، سەرجەمی لایەنەكان و شێوازەكانیتری خەباتی پێ هەڵدەسەنگێندرێ و وەك كۆڵەكە و بڕبڕەی پشتی جموجوڵە سیاسیەكانی كۆمەڵە ناوزەد دەكرێ. گرنگی پرسی خەباتی جەماوەری بۆ هێزێكی چەپ و رادیكاڵی وەك كۆمەڵە جێگە گومان و موناقەشە نیە، بەڵام كارنامەی ئەو شێوازە خەباتە لە بیست و ئەونە ساڵی رابردوو جێگەی باس و تێڕامانە. ئایا دەكرێ بە غەیری چەند نموونەی دەگمەن باس لە خەباتێكی جەماوەری رۆتین و گشتگیر لە كوردستان بكەن؟ ئایا دەكرێ دەسكەوتە دیار و نادیارەكانی ئەو شێوازە لە خەبات لە چوارچێوەی بەرەوپێشچوونەكانی پرسی بزووتنەوەی شۆڕشگێڕانەی كوردستان دەستنیشان بكەن؟ ئایا پێتانوانیە بە هۆی كۆمەڵێك فاكتەری مێژوویی و جوگرافی خەباتی چەكداری دەتوانێ وەك سەنتەرێک بۆ هەموو شێوازەكانیتری خەبات دەستنیشان بكرێ و لە ئیرادە بۆ هێنانەئارای ئەو شێوازە لە خەبات باس لە گەرموگوڕبوونی شێوازەكانیتری خەباتی وەك خەباتی جەماوەری و دیپلۆماسی بكرێ؟
لەو سۆنگەوە و لە چاوی تێگەیشتنی خۆم و بەسەركردنەوەی مێژووی دوو دەیەی رابردوی كوردستان لەو بڕوایەدام كە پێداگریكردن لەسەر خەباتی ناتووندوتیژ، خەباتی مەدەنی و جۆرەكانیتری ناسراو بە خەباتی نەرم و هەتادواتر زیاتر رەمز و ناوی شەوی بێ ئیرادەیی، كۆنەپارێزی و خوگرتن بە ئۆردوگانشینییە. كاتێك كە ساڵانە بە سەدان كۆڵبەر بە تەقەی راستەوخۆی هێزەكانی كۆماری ئیسلامی دەكوژرێن، كاتێك كە كۆماری ئیسلامی بەوپەڕی دڵنیایی و بڕوابەخۆبوونەوە باس لە نەبوونی هیچ كێشەیەكی ئەمنی لە كوردستان ئەكا و كاتێك پلان بۆ فازێكی نوێی گەشەی ئابووری و بازرگانی نیولیبراڵی لە ئێرانێكی تەواو ئەمن لەژێر سێبەری دیكتاتۆری و ئیستبدادێكی رووت و رەها ئامادەدەكرێ، باسكردن لە خەباتی ناتووندوتیژ و مەدەنی زیاتر لە جۆك و خۆڵكردن ناو چاو دەچێ.
هاوڕێ ئیبراهیم! رێگەگان كوێربوونەوە، رێگەكان داخراون، بابە رێگە بڕین رێگەی نوێ بدۆزینەوە، وەك ئەوەی لە باكوور دەكرێ، لە ئەمریكای لاتین كرا و لە زۆر شوێنیتریش لە داهاتوودا دەكرێ. رێگەبڕین و دۆزینەوەی رێگەی نوێ ئیرادەی دەوێ، حزبی شۆڕشگێڕ و بەدەربەستی دەوێ و قۆناغێكی نوێ لە ماندوبوون و تیاچوون و فیداكاری دەوێ، ئەگەر ئەو ئیرادە لە خۆتا شك دەبەی :” بیسمیلا”.
