چەپی ئیسپانیا، ئەزمونێك بۆ هاوڕێیان/ عەلی مەحمود

لە ساڵی 1936 تا 1939, لە نزیك 50 وڵاتەوە گەنجانی كۆمۆنیست و ماركسی و ئاناركیستی و ئازادیخواز سەفەری شۆرشیان كرد و چووونە ئیسپانیا لیوا سورە نێونەتەوەییەكانیان پێك هێنا,

ئێستا لە كاردانەوەی ئەو هاوكارییە جیهانییە, چەپی ئیسپانیا بۆتە ئیلهام بۆ لیواكانی دادپەروەری و ئازادی لە جیهاندا, نموونە رازیم(دەتوانین بە پۆڵەندی) حیزبێكی دەستە خوشكی پۆدیمۆسە لە پۆڵەندا, ماوەی رابردوو لە كاتێك كۆنگرەیان دەبەست, لاوەكان لە سەر كورسیەكانیان دابەزیبوونە سەر زەوی بۆ گفتوگۆ گەرموگوڕەكانیان لاقیان لەبەردەم سەركردەكانیان راكێشابوو بە دیار لاپتۆپەكانیانەوە گرمۆڵە ببون, نموونەیەكی باڵای رۆمانسی سیاسیان نمایش دەكرد,ئەوان قودسیەتی نموونەی باڵای سیاسیەكانیان تێك شكاند, نمونەیەكی سیاسی سادەی پڕ لە یەكسانی سیاسەتكردنیان بەرهەم هێنا, حیزبی بێ وتە بێژو سەرۆك, خەرجكردنی بودجەی حیزبەكەیان بۆ لێقەوماوان, داواكاری نابێت موچەی پەرلەمانتار لە 3 جاری لانی كەمی كرێ زیاتر بێت, بەشداری هەموو ئەندامانی حیزب لە گفتوگۆكانی كۆنگرە لە رێگای تۆڕە كۆمەڵایەتییەكان,……, هەموو ئەمانە ئیلهامەكەی لەو كۆنگرە حیزبییە گشتیانەوە هات كە لە شەقامە پان و بەرینەكانی مەدریدو بەرشەلۆنە بە بەرچاوی خەڵك و كەناڵەكانی راگەیاندنەوە ئەنجامدران.

نازانم هیچ كوردێك بەشداری لیوا سورەكانی ئیسپانیایان كردووە یان نا ؟, ئەو شانازییە پشكێكی بەر كورد و پێك هاتەكانی دیكەی كوردستان دەكەوێت یان نا؟, وەلێ دەكرێت ئەورۆ بەشداری لە دەستكەوتە سیاسییەكانی چەپی ئیسپانی بكەین لە بواری خۆ رێكخستنی حیزبی و دیموكراسی راستەوخۆ لە ناو حیزبە دەستە خوشكەكانی ئیسپانیا, كە نەوەی بەتالیۆنە سورەكانی دوێنێن.

لە سەروبەندێكدا بیرنەر ساندەرز كاندیدی سۆسیالستخوای پۆستی سەرۆك كۆماری ئەمەریكا داوای سنور دانان بۆ بەخششەكان و گۆڕینی سستەمی دەنگدان لە ناو حیزبی دیموكرات دەكات بەوەی كۆتایی بە دەنگدانی دەنگدەرانی تایبەتی باڵا بێت كە ژمارەیان نزیك 500 كەسە و 25%ی دەنگدەران پێك دەهێنن, لە كاتێكدا كەس ئەوانی هەڵنەبژاردووەو بەشێوەی بیروكراتیانە رەوتی دەنگدانەكان یەكلا دەكەنەوە, لە لایەكی دیكەوە, ۆڵ ستریت بە بەخششە زۆرو زەبەنەكانیان هەمیشە رۆڵیان هەبووە لە دیاریكردنی كورسی سەرۆك لە وڵاتدا, لە لایەكی دیكەوە راپرسیەكان دەریدەخەن كە 71%ی هاووڵاتیانی ئەمەریكا پێیان وایە نا دادپەروەری هەیە لە هەڵبژاردنی كاندیدەكان بۆ پۆستی سەرۆك كۆماری وڵات لە ریزی دوو پارتە دەسەڵاتدارەكەی ئەمەریكا, زۆرینە لە گەڵ ئەوەن كاندیدان راستەوخۆ هەڵبژێردرێن, نەك بەم هەموو پرۆسە بیروكراتیەدا بڕوات, بۆیە ناكرێت ئەو پرسیارە دوبارە بكەینەوە كە سەرمایەداری و سستەمەكەی ناتوانێت دیموكراسی بێت وەك خۆی ئیدعا دەكات, بۆ دەبێت سەرۆك هەر لەم دوو پارتەوە بە نۆرە هەڵبژێردرێت؟, ئەمە تەواوی كایەی دیموكراسیەتی بۆرژوازییەت دەخاتە ژێر پرسیارەوە.

لای خۆشمان ئەوانەی ئیدعایان دەكرد, تەنها دوو خول خۆیان بۆ پۆستی سەرۆك پارتەكەیان كاندید دەكەن و گوایە داهێنانیان كردووە لە ژیانی حیزبیدا, كە لە راستیدا زۆر لە دواوەن لە دیموكراسیەتی حیزبی, دەیان ساڵە ژیانی حیزبی ئەم تەرزەی لە دیموكراسی ناوخۆیی حیزبی بەجێ هێشتووە, كەچی لەوەندە كەمەش پەشیمان بوونەوە, ئەنجامدانی كۆنفرانس و كۆنگرە دوای 4 ساڵ بە دەستكەوت دەفرۆشنەوە, لە كاتێك ئەمرۆ نەك ئەندامانی كۆنگرە بگرە سەرجەم ئەندامانی پارت لە ناو بەشێك زۆر لە پارتە سیاسییەكان بەشداری هەڵبژاردنی سەرۆكی حیزبە كەن و كۆنگرەی كراوە ئەنجامە دەن, ئەوە ئەركی چەپەكانە نموونەیەكی باڵاتر لە دیموكراسی ناوخۆی حیزبی و كۆمەڵایەتی پێشكەش بكات بە مرۆڤایەتی, چونكە تەنها ئەوانن لە گەڵ دیموكراسیەتی راستەوخۆی سیاسی و ئابوریدان و خەبات بۆ دیموكراتیەكی راستەوخۆی كۆمەڵایەتی و سۆسیالستی دەكەن, لەم چوار چێوەیەدا دەبینین چەپی ئیسپانی نموونەیەكی باڵا لە بوونی دیموكراسی راستەوخۆ لە بڕیار و هەڵبژاردنە ناوخۆیەكان پێشكەش دەكات.

5 ساڵ لەمەوپێش لە گۆڕەپانەكانی مەدرید, گەنجان رژانە سەر شەقامەكان و داوای دیموكراسیەتی راستەوخۆو دابەشكردنی دادپەروەرانەی سەروەت و سامانیان كرد, لە شارو شارۆچكەكانیش بەرەو روی ئەو پۆلیسانە بوونەوە كە دەیانەویست هاووڵاتیانی هەژار لە خانووەكان دەربكەن بەهۆی نەدانی قستی خانووەكانیانەوە, وردە وردە لە هەناوی ئەم بزووتنەوە ناڕەزایەتییەوە بزووتنەوەیەكی سیاسی بەرفراوان لە دایك بوو .
یەكێك لەو گەنجانە لەناو ئەو لەشكرە گەنجە لە دواییدا بەرجەستە بوو , پێشكەشكارێكی تەلەفزیۆنی لێ هاتوو و كادیرێكی قوتابی شیوعی و مامۆستای زانستە سیاسییەكانی زانكۆ, هەموو كات بڵندگۆ بە ملیەوە, شەقامەكانی ئیسپانیای بە پێیەكانی تەی دەكرد بۆ گەیاندنی بانگەوازەكەی, بە بێدەنگی و بە سادەیی بڵندگۆكەی بۆ قسەكەرانی رادەگرت تا پەیامەكانی خۆیان بگەیەنن, ئیتر ئەوانە بێكارێك بونایە, یان سیاسیەكی دیار, جیاوازی ناكرد, ئەو گەنجە روح سوك و خۆنەویستە ناوی بابلۆ ئیغلیسیاس بوو, دوایی 3 ساڵ بووە یەكێك لە سەركردەو ئەكتەرە قسە رۆیشتووەكانی ئەو وڵاتە,ئەمرۆ سەركردایەتی 2 حكومەتی ناوچەیی لە شارە هەرە گەورەو پڕ حەشاماتەكانی وڵاتەكەی ئەویش مەدریدی پایتەخت و بەرشەلۆنەیە دەكات و بێ ئۆكەی ئەو حكومەتی ناوەندیش پێك نایات .

چی كرد بۆ كۆكردنەوەی دەنگەكان
لە كۆبونەوەیەكی بەرفراوان, لە ژینگەیەكی شۆرشگێڕانە پڕ حەماسیدا بە بەشداری سەركردەی پێشووی حیزبی شیوعی ئیسپانی خۆلیۆ ئەنگویتە, بابلۆ ئیغلیساس هەرچەندە حیزبەكەی 550% زیاتری دەنگەكەی لیستەكەی ئەوانی هێناوەتەوە, وەلێ بە قورگی پڕ گریانەوە بەرەو پیری دەچێت و لە باوەشی دەگرێت, چەپڵە بە دوایدا هۆڵەكە دەلەرێنێتەوە, چەپَڵە لێدانێك هێزێكی زیاتر لەو چركە ساتەوە دەبەخشێتە چەپ, لە ناو ئاپورای ئەو چەپڵە رێزانەوە لیستی یەكگرتووانە دەتوانین لە دایك دەبێت.

بەڵێ لە 9ی ئایار كۆبونەوەكە كرا, هاوپەیمانی (( یەكگرتووانە دەتوانین )) پێك هات, بەسەركردایەتی سیاسیە گەنجەكە, كە ناوەرۆكی بەرنامەكەی لە 50 خاڵدا خۆی دەبینێتەوە, بەرنامەكە تژییە لە دەستەواژەی خەبات بۆ دیموكراسی كۆمەڵایەتی, كەمكردنەوەی نایەكسانی, راپرسی و مافی چارەنووس, دەوڵەتی كۆماری…., جیاوازی ئەوان لە گەڵ پارتەكانی ئێمە ئەوەیە لە كاتی كەعەك دابەشكردنی حكومەت ئەو خاڵانە بڕیارە دەن نەك قەبارەی پارچە كەعەكەكەی وەریدەگرن .

وشەی یەكەم بۆ ناوی هاوپەیمانیەتیەكە لە یەكێتی چەپ (شیوعی- سەوز) ەوە هاتووە, دووەمیش لە پۆدیمۆس (دەتوانین) ەوە هاتووە, ئەوەی گرنگە چۆن یەكگرتووانە دەتوانن لە دوای 26ی یۆنی كاریگەرتر بن لەمڕۆ و ئەگەریش نەچوونە دەسەڵاتەوە ئەوا ئۆپۆزسیۆنی سەرەكی حكومەت بن, لە وڵاتێك چواەم هێزی ئابووری ئەوروپایە, داهاتی نەتەوەیی نزیكە لە داهاتی نەتەوەیی هەموو وڵاتانی عەرەبی , كاریگەری ئۆپۆزسیۆنی بەهێز لە زۆر حالەتی سیاسیدا بە تایبەت لە وڵاتانی ئەوروپای رۆژئاوا كاریگەرترە لە دەسەڵات, چونكە دەتوانێت پەلكێشی حكومەت بكات بۆ ملكەچی بەرنامەكەی, یان هەنگاوەكانی ئەو سڕ بكات و جوڵەی لێبخات, وەك لە ئیسپانیا كرا.

بەم یەكگرتنە لیستی یەكگرتووانە دەتوانین بەهۆی یاسای هەڵبژاردنەوە دەتوانێت ژمارەی كورسیەكانی ئەگەر دەنگی رابردووش بهێننەوە, 18 كورسی زیاتر لە جاری پێشوو كە 71 كورسییە بهێننەوە لە كۆی 350 كورسی پەرلەمانی وڵات, بەهۆی یاسای نا دیمكراسی هەڵبژاردن لە ئیسپانیا لە هەڵبژاردنی رابردوو ئەو كورسیانەیان لە دەست دا.

هاوپەیمانی یەكگرتوانە دەتوانین لە كێ پێك هاتووە :
ئەم هاوپەیمانیەتیە لە 3 پارتی نیشتمانی(پۆدیمۆس, یەكێتی چەپ”شیوعی,سەوز”,پارتیEquo كە لە ریزی پارتە سەوزەكانی ئەوروپایە ) هاوكات 10 پارتی چەپی هەرێمی بە ناوەكانی (( (UPeC), (CLIAS), (Democracia Participativa), (PUM+J) in Madrid, (Més) , (ZEC) , (Batzarre) , (IzCa) , (IAS) )) و 4 هاوپەیمانی هەرێمی (((En Comú Podem) in Catalonia, Compromís–Podemos–EUPV (A la valenciana), In Tide (Podemos–En Marea–Anova–EU) in Galicia, (Ahora Alto Aragón en Común) in Huesca)) پێك هاتووە.

لە هەڵبژاردنی دیسەمبەری 2015 ەی رابردوودا, جگە لە هەرێمی باسك كە متمانەی خۆی بەخشیە هێزە نەتەوەییە ناوچەییەكە, لە هەموو ناوچە نەتەوەییەكان دیكە, هاووڵاتیان متمانەیان بە چەپەكان دا بە كەتەلۆنیاشەوە, لیستی چەپەكان پارتی یەكەمی هەرێمەكان بوون, ئەوانیش شێلگیرانە داكۆكیان لە مافی چارەنوسی ئەو گەلانە كرد و نەیان هێشت دەنگەكانیان بە فیڕۆ بڕوات, خاڵێك كە هۆكاری ئەوە بوو حكومەتی ئیتلافی لە گەڵ پارتی سۆسیالست پێك نەیات, رازی نەبوونی بوو بە ئەنجامدانی راپرسی وەك هەنگاو بەرەو بە پراتیك كردنی مافی چارەی خۆنوسین لەو هەرێمانە.بۆرجوازی ئیسپانی دەتران پەتای كەتەلۆنیای هەرێمەكانی دیكەش بگرێتەوە.

هێزی پێكەوە دەتوانین
لە هەڵبژاردنی مانگی دیسەمبەری 2015ەدا , پارتی گەلی دەسەڵاتداری راستگەرا 7,236,965 دەنگ, كە دەیكردە 28,71%ی دەنگەكان و 123 كورسی هێنایەوە, پارتی سۆسیالستی كرێكاری 5,545,315 دەنگ, كە دەیكردە 22,00%ی دەنگەكان و 90 كورسی هێنایەوە, پۆدیمۆس 5,212,711 دەنگ, كە دەیكردە 20,68%ی دەنگەكان و 69 كورسی هێنایەوە, لیستی یەكێتی چەپ 926,783 دەنگ و 3,68%ی دەنگەكان و 2 كورسی هێنایەوە, (Més) 33,877 دەنگ و 0,13%ی دەنگەكان و هیچ كورسی هێنایەوە … .
پۆدیمۆس و بەرەی چەپ و ماس خۆیان لە ریزی لیستی یەكگرتوانە دەتوانینن, لەناو هێزە چەپە جدییەكان تەنها پارتی كۆمۆنیستی گەلی ئیسپانی بەشدار نیە لە لیستەكە, كە لە هەڵبژاردنی رابردوودا 31179 دەنگ و 0,12%ی دەنگەكان و هیچ كورسی هێناوەتەوە, دابڕانی لە لیستی هاوبەشی چەپەكان وێڕای كەمی دەنگەكانی وەلێ گرنگی مەعنەوی هەیە, بەمەش لەم هەڵبژاردنەدا لیستەكە ناتوانێت كەڵك لە وزەی كادیر و هەڵسوڕاوانی و دەنگەكانی ببینێت, ئەمە وێڕای لە لای گروپێك پرسیار لەسەر رەوایەتی لیستەكە دروست دەكات وەك نوێنەرایەتی سەرجەم چەپی ئیسپانی .
لە هەڵبژاردنی رابردوو جگە لە دەنگی ئەو لایەنە هەرێمیانەی بەشداری كەمپەینی هەڵبژاردنی لایەنە بەشداربووەكانی پێكهێنەرەكانی لیستەكەیان كردبوو , لیستەكە 6,173,371 دەنگی هێنابوەوە, واتا دووەم لیستی براوەی هەڵبژاردنەكە بوون, كە 1063594 دەنگ كەمتر لە لیستی پارتی گەلی دەسەڵاتداری راستگەرای هێناوەتەوە, وە 628056 دەنگ زیاتری لە براوەی دووەم كە پارتی سۆسیالستی كرێكارییەی هێناوەتەوە.
ئەم یەكگرتنە وێڕای ئەوەی چەپی ریشەیی دەكاتە هێزی دووەمی وڵات هاوكات هیوایەكی زیاتر دەدات بە چەپی جدی رۆڵی كاریگەرانەتر ببینێت و شوێن بە چەپی ناوەندی سازشكار (سۆسیالست) چۆڵ بكات لە نەخشەی سیاسی وڵات, هاوكات وەك ئیدعای سەرۆكایەتی چەپیش رەوایەتی بۆ سۆسیالست نامێنێتەوە, بەڵكە لە دوای 26ی یۆنییەوە ئیتر سەرۆكایەتی چەپ بۆ یەكەمجار لیستی یەكگرتوانە دەتوانین دەیكات لە ئیسپانیا .

بەشداری هەمووان لە دەنگدانەكان
هەردوو لایەنی سەرەكی پێكهێنەری لیستی یەكگرتوانە دەتوانین, پێش ئەنجامدانی هاوپەیمانیەتیەكە راپرسی گشتیان لە ریزی لایەنەكەی خۆیان ئەنجامداوە, بۆ ئەوەی سەرجەم ئەندامان بەشداری لە بڕیارەكان بكەن, ئەوان نەك تەنها بۆ ئەم هاوپەیمانیەتیە بەڵكە بۆ هەموو بڕیارە گرنگەكانی خۆیان, ئەوەی پەیوەست بە هەڵبژاردن و حوكمڕانی و هاوپەیمانییەوە هەیە, تەنانەت بۆ پەسەند كردنی بەرنامەی هەڵبژاردن و سەرجەم بڕیارو كاروبارە گەورەكان دەگەڕێنەوە بۆ راوەرگرتنی سەرجەم ئەندامان لە رێگای راپرسی گشتییەوە كە سەرجەم ئەندامان تێیدا بەشدار دەبن .
لیستی چەپی یەكگرتوو, بۆ ئەنجامدانی هاوپەیمانی لە گەڵ پۆدیمۆس, 20 هەزار ئەندامی لە كۆی 71578 ئەندامی بەرەكە بەشداری دەنگدانەكەیان كرد, لە ئاكامدا 84,5%ی دەنگدەران دەنگیان بۆ هاوپەیمانیەتیەكە دا لە گەڵ پۆدیمۆس, 13,1% ەش دژ و 2,4%یش دەنگیان بە سپی دا.
ئەوەی شایانی باسە لە هەڵبژاردنی پێشووشدا, لیستی چەپی یەكگرتوو پێشنیاری هاوپەیمانیەتی كرد لە گەڵ پۆدیمۆس, وەلێ ئەوان رەتیان كردەوە, تەنها لە هەندێك هەرێم وەك كەتەلۆنیاو گالیكا لیستی هاوبەشیان دروست كرد .

ئەلبەرتۆ غارسۆن وتە بێژی چەپی یەكگرتوو رایگەیاند ئێمە هەمیشە لە گەڵ لیستێكی چەپی یەكگرتووین لەسەر ئاستی نیشتمانی, لە هەڵبژاردنی پێشوو حیزبی شیوعی داوای لیستی بەرەی گەلی یەكگرتووی كرد لە سەر ئاستی نیشتمانی, نەك تەنها دوو هەرێمی كەتەلۆنیا و غالیكیا, كە بە هۆی نەبوونی ئەو بەرەیەوە 18 كورسیان لە دەستدا.

هەرچی پۆدیمۆسە, لە 14 بۆ 16ی نیسان راپرسی لە ریزی ئەندامانیدا ئەنجامدا, كە 149513 ئەندام تیایدا بەشدار بوون لە كۆی 393538 ئەندام(لە ئێستادا 426927 ئەندامی هەیە) كە دەیكردە 37%ی كۆی ئەندامان,91,79%ی دەنگدەران پشتیوانیان لە پێك هێنانی حكومەتی گۆڕانكاری كرد لە گەڵ لیستی چەپی یەكگرتوو.

هاوكات88,23%ی ئەندامانی بەشدار بوو لە راپرسییەكە دژ بە پشتیوانیكردنی حیزب بوون لە حكومەتی هاوپەیمانی سۆسیالست و سیدانۆسی راستگەرا.
ئەوەی شایانی باسە, لیستێكی 25 كەسی, كاندیدانی لیستی یەكگرتووانە دەتوانین دیاری دەكات, دواتر جارێكی دیكە لە راپرسی گشتیدا, بەرنامەی هەڵبژاردن و كاندیدەكان دەنگیان لەسەر دەدرێتەوە, وە هەموو كاندیدەكان لە ناوچەكانی خۆیان بە راپرسی ئەندامانی حیزبەكان دیاریدەكرێن.
ئەم تەرزە لە مومارەسەی راستەوخۆی دیموكراسی , تەنانەت لە ژیانی حیزبیش رەنگەداتەوە, بابلۆ ئیلیغساس لە 18 و 19 ی ئۆكتۆبەری 2014, بە دەنگدانی 55 هەزار ئەندام لە كۆی 100هەزار ئەندامی ئەوكاتی پۆدیمۆس لیستەكەی بە هێنانی 88,6%ی دەنگەكان بردیەوەو بووە كەسی یەكەمی پارتەكەی .

لایەنێكی دیكە لە چەپی ئیسپانیا كە شایانی هەڵوێستە لەسەر كردنە, لیستی یەكێتی گەلە لە كەتەلۆنیا ( Popular Unity Candidacy-cup ) كە لە ساڵی 1986 دامەزراوە, تەنها بەشداری هەڵبژاردنی هەرێمی كەتەلۆنیا دەكات, لە هەڵبژاردنی ئیسپانیا بەهۆی باوەر بوونی بە سەربەخۆیی كەتەلۆنیاوە بەشداری ناكات, ئەمانیش لە كۆبونەوەی گشتی بڕیارەكانی خۆی دەدات, لە هەڵبژاردنی كەتەلۆنیا لە ساڵی 2012, بە بەشداری 650 ئەندام كۆبونەوەی گشتی ئەنجامدرا لە هەوایەكی ئازاددا , بە رێژەی 77% بڕیاری دا بەشداری هەڵبژاردنەكە بكات.

لە 27ی دیسەمبەری 2015 دوا كات بوو بۆ پێك هێنانی حكومەتی كەتەلۆنی, هەفتەی پێشوتر لە دەنگدانێكی گشتیدا, 1515 بە 1515 كوب نەیتوانی بڕیاری یەكلا كەرەوە بدات بۆ بەشداری یان پشتیوانی لە حكومەتی كەتەلۆنی بە سەرۆكایەتی سەرەك وەزیرانی راستگەرای پێشوویكەتەلۆنیا ئەرتۆر ماس,بەهۆی پەیڕەوكردنی سیاسەتی تەقەشوفی ئابورییەوە لە كابینەی پێشوو لە هەرێمی كەتەلۆنیا, بۆیە خەریك بوو دوبارە لە هەرێمەكە هەڵبژاردن بكرێتەوە, وەلێ لە دوا كاتدا ,بە جیاوازی دەنگێك بڕیاری پشتیوانی لە حكومەتی دا بە مەرجی گۆڕینی سەرۆك وەزیران و پشتیوانی كۆمەڵایەتی لە دەستەنگانی كەتەلۆنیا, بۆیە لە 4 یەنایەر ماس گۆڕا بۆ ئەتۆنیۆ بانۆس , ئەوجا كوب دەنگی دا بە كابینەكە, لیستی پێكەوە لە پێناو بەڵێ 62 كورسی لە كۆی 135 كورسی لە پەرلەمانی هەرێمەكەی هێنابوەوە , كە لە هاوپەیمانی چەپ و راستی نەتەوەیی كەتەلۆنی پێك دەهات, بێ بەشداری كوب نایتوانی حكومەتی هەرێمی پێك بهێنێت, كوب 10 كورسی هێنایەوە لە هەڵبژاردنی 26ی ئۆكتۆبەری 2015 ەدا , رۆڵی مەلیكی دەگێڕا لە یەكلاكردنەوەی پارسەنگی هێزەكان .
واتا كوب پشتیوانی لە حكومەتی كەتەلۆنی بەستەوە بە بەرنامە ئابوری و كۆمەڵایەتییەكانەوە, نەك پشتیوانییەكی كوێرانە لە پرسە نەتەوەییەكان .

كۆی ئەزموونەكان بۆ چەپەكانی كوردستان
لە كۆی ئەوەی لێرەدا باسمان كردن لە ئەزموونی چەپی ئیسپانیاوە, دەشێت كۆمەڵێك ئەزمون هەڵێنجین ببێتە رێنیشاندەر بۆ چەپەكانی كوردستان, چەپی كوردستان پێویستە ئەزموونی چەپی جیهان بە بەشێك لە ئەزموونی خۆیان و دەستكەوت و پێشكەوتنەكانیان لە گۆڕەپانی تێكۆشان و ژیانی حیزبیدا بە دەستكەوتی خۆیان بزانن و خاوەندارێتی لێ بكەن, وەك چۆن قوتابخانە جیاجیاكانی بۆرجوازی كوردی دەیكەن.

1- گرنگە چەپەكان لە لیستێكی بەرفراواندا كۆببنەوە, بۆ ئەمەش راپرسی لە ریزی ئەنداماندا بكرێت .
2- دەكرێت چەپەكان دەستپێشخەر بن لە دیموكراسی حیزبی, كاتی دیاریكردنی سكرتێر لە رێگای چەند ئەندامێكی كۆمیتەی ناوەندیەوە نەماوە.
3- بڕیارە گرنگەكانی حیزب دەكرێت لە رێگای راپرسی سەرجەم ئەندامانەوە بدرێت, نەك نوخبەیەكی بچوكی سەركردایەتیەوە, بۆ ئەمەش بۆ بڕیارەكان بگەڕێنەوە بۆ راپرسی سەرجەم ئەندامان.
4- چەپەكان دەكرێت داكۆكیكەی سەرسەختی كەمایەتییە نەتەوەیی و ئاینییەكان بن لە كوردستان وەك هەمیشە وابووونە, لە كاتی هەڵبژاردن لیستی چەپی تایبەتیان بۆ پێك بهێنن.
5- پێویستە پشتیوانی لە حكومەتی سەربەخۆی كوردستان پەیوەست بێت بە سیاسەتی حكومەتەكەوە, بەرامبەر بە دیموكراسی و مافی مرۆڤ و مافی هەژاران.
6- چەپ ململانێی بۆرجوازی كوردستان لە سەرجەم هەڵبژاردنەكان بۆ هەموو پۆستەكان بكات, ئەلتەرناتیفی بۆ هەموو گوتار و كارەكانی هەبێت.
7- چەپەكان هێزی شێلگیری داكۆكی لە كوردستانێكی دیموكراتی كۆمەڵایەتی بن, كوێرانە نەكەونە دوای وتارە نەتەوەییە بۆرجوازییەكان.
8- چەپەكان كار بۆ دیموكراسیەتی راستەوخۆی كۆمەڵایەتی سۆسیالستی بكەن بۆ ئایندەی كوردستان.