زاگرۆس پۆست
64 ئەندامی خۆجێیی بەسیجی كۆماری ئیسلامی لە دوو ناوچەی مەرگەوەڕ و سومای ورمێ، بە مەبەستی رەوانە كردن بۆ سوریە و ئەنباری عێراق ئامادە كران.
بە پێی راپۆرتی ماف نیوز، لە ماوەی رۆژانی رابردوو بەخشنامەیەك كە لە لایەن سپای پاسدارانی ئێرانەوە دراوەتە رێكخراوی بەسیج لە پارێزگای ورمێ، دەبێ لە ماوەی 6 رۆژدا، ئامادەكارییەكان بۆ ناردنی 64 كەس لە ئەندامە خۆجێییەكانی بەسیج لە دوو ناوچەی مەرگەوەڕ و سۆمای ورمێ بۆ ناوچەی ئەنباری عێراق و سوریە جێبەجێ بكرێ.
بڕیارە ئەم گرووپە لە بەسیجیەكان، بە جلی نیزامیی “حەشدی شەعبی” بۆ ناوچە جیاجیاكانی ئەنباری عێراق بنێردرێن و لەوێ لە دژی چەكدرانی داعش شەڕ بكەن.
گرووپێكی دیكەی 64 كەسی، بڕیارە بە شێوەی نهێنی و لە رێگای سنوورەكانی توركیە، رەوانەی سوریە بكرێن.
ئەم داواكارییەی سپا، لە لایەن هەندێ لە ئەندامە خۆجێییەكانی بەسیجەوە لەگەڵ دژایەتی بەرەوڕوو بوونەوە و رایانگەیاندووە، رێكەوتننامەی ئەوان لەگەڵ ئۆرگانە نیزامییەكانی ئێران، تەنیا لە ناو خاكی ئێران بووە و بە هیچ شێوەیەك ئمادەی شەڕ لە دەرەوەی سنوورەكانی ئەو وڵاتە نیە.
بەم پێیە، سپا ئەو كەسانە وەكوو ئەندامانی سپای قۆدس، لە دەرەوەی ئێران بەكاردەهێنێت.
