زاگرۆس پۆست
مامۆستایەكی كوردی قوتابخانە سەرەتاییەكانی ناوچەی چۆمی مەجیدخان لەلایەن دادگای شاری میاندواوەوە بە چوار مانگ بەندكردن حوكم دراوە.
بە پێی هەواڵیباسنیوز، ناوی ئەو مامۆستایە”حەبیب ئاغا زەمان”ــە و پێشتریش لەلایەن بەڕێوەبەرایەتی پەروەردە و بارھێنانی پارێزگای “ورمێ””یەوە وانە وتنەوەی لێ قەدەغە كرابوو. دەوترێت حەبیب بە تۆمەتی ڕێزگرتن لە بۆنە نەتەوەییەكانی كورد و ھاندانی قوتابیانی سەبارەت بە بەڕێوەبردنی جێژنەكان ئەو زەخت و گوشارانەی خراوەتە سەر.
ئەو مامۆستا كوردە كە ماوەی ٨ ساڵە لە قوتابخانەكانی ناوچەی چۆمی مەجیدخان وانە دەڵێتەوە ھیچ كێشەیەكی یاسایی نەبووە و خەڵكی ناوچەكەش زۆر لێی رازی بوون و ئێستە ماوەی یەك مانگە لە وانە گوتنەوە بێبەش كراوە. ناوبراو ماوەی ٦ مانگ لەمەوبەر لەلایەن ئیدارەی ئیتلاعاتی شاری میاندواوە بانگھێشت و دەستگیر كراوە. بەپێی زانیارییەكان ئەو مامۆستا كوردە بۆ كێشانی چوار مانگ زیندانی رەوانەی بەندیخانەی شاری میاندواو كراوە.
