زاگرۆس پۆست
هیدایەت قادری، ئەندامی پێشووی کۆمیتەی ناوەندی کۆمەڵەی شۆڕشگێڕی زەحمەتکێشانی کوردستانی ئێران بۆ “وشە” دەڵێ: “ماوەیەکە لیژنەیەکی هەماهەنگیمان لە هەر سێ لایەن پێک هێناوە بۆ دانیشتن و باسکردنی چۆنیەتی یەکگرتنەوەمان و ئێستا گەیشتووینەتە قۆناغی کۆتایی و لە مانگی داهاتووڕا دەست دەککەین بە پێکهێنانی سمیناری هاوبەش بۆ قسەکردن لەسەر ناو و سیاسەتە گشتییەکانی ئەو حزبە یەکگرتووە”.
دووپاتیشی دەکاتەوە: “ئامانجی ئێمە لەو یەکگرتنەوەیە بوژانەوە و دامەزراندنەوەی کۆمەڵەیەکی راستەقینەیە بە بیروباوەڕێکی چەپی کوردستانی و نیازی دژایەتی کردنی هیچ لایەنێکی سیاسی رۆژهەڵاتمان نییە، هەر بۆیە فەزای دانیشتنەکانمان زۆر دۆستانە بەڕێوە چووە”.
لەناو ئەو سێ لایەنەدا تاکە لایەنێک کە حزب و دامەزراوە و رێکخستنی هەیە، کۆمەڵەی زەحمەتکێشانی کوردستانە و خاوەندارێتی تێکەڵبوونەوە لەو دۆخەدا دەکەوێتە سەر شانی ئەو حزبە و قادریش دەڵێ، تا پێکهێنانی کۆمەڵە ئێمە رێز لە سەروەری پێڕەو و پرۆگرامی ئەو حزبە دەکەین و ئاشکراشی دەکات: “لە کۆنفرانسەکانی مانگی داهاتووماندا ئامادەکاری بۆ ئەوە دەکەین بە زووترین کات کۆنگرە ببەستین، راستە ئێستا تەنیا کۆمەڵەی زەحمەتکێشانی کوردستان خاوەنی دامەزراوە و ئەساسنامەیە، بەڵام ئێمە لەو سیمینارانەدا دەستنیشانی ناوێکی تازە بۆ حزبە یەکگرتووەکە دەکەین، هەر ناوێکیشمان بۆ دەستنیشان کرد پاشگری کۆمەڵەی پێوە دەبێت و دەشبێ ئەو حزبە تەعبیر لە کۆمەڵەیەکی راستەقینە بکات کە بە درێژایی دامەزراندنی هی خەڵکی هەژار و چەوساوەی ناو خانووە قووڕاوییەکان بووە”.
